GALURA.CO.ID -Kecap Galuh saenyana lain ukur milik urang Ciamis. Kecap Galuh tepi ka ayeuna dipake ngaran wanoja. Dina Babad teu weleh aya ngaran karajaan Galuh ngan lain fakta sajarah. Anu epigrafina kuat mah prasasti di Kedu nu nyabit ngaran Pragaluh.
Sajarawan Sobana Hardjasaputra, nyebutkeun masarakat Ciamis loba ngagunakeun ngaran Galuh lantaran Galuh mibanda sejarah nu jelas sarta kungsi nyatetkeun kamashuran jeung kajayaan. Ayana Karajaan Galuh puguh fakta sajarahna.
Dina sejarah, ngaran Galuh ti abad ka-7 tepi ka abad ka-16 teu eureun-eureun ngélébét, ti mimiti ngaran karajaan tepi ka ngaran kabupatén. “Karajaan Galuh ngadeg abad ka-7 Maséhi, anu ngadegkeunana Wretikandayun tepi ka abad ka-16 masih dipaké jadi ngaran kabupatén, Kabupatén Galuh,” ceuk Sobarna.
Baca Juga: Situs Pasir Pantun di Desa Ciparigi, Kabupaten Ciamis, Pamali Nanggap Wayang
Puncak kajayaan Karajaan Galuh jaman pamaréntahan Prabu Niskala Wastu Kancana, puseur karajaanna di Kawali Ciamis. “Ngaran Galuh henteu terus ragrag pamorna najan ti taun 1595 jadi daérah patalukan (vassal) Mataram. Kitu deui jaman dikawasa ku VOC ti taun 1705 tepi ka ahir abad ka-18,” ceuk Sobana.
Waktu dibupatian ku Kusumadiningrat (1839-1886), pamor Kabupatén Galuh kuat pisan, jadi kabupatén nu pada ngambeuan, kaasup ku Belanda. Kusumadiningrat hiji-hijina bupati nu wani ngabubarkeun sistim tanam paksa, jeung hiji-hijina bupati nu mampu ngarobah rarancang Belanda waktu nyieun jalan karéta api
Ngaran Galuh ogé nyampak dina legénda atawa tradisi lisan. Ceuk Sobana dina wawacan Sajarah Galuh upamana disebutkeun ngaran Galuh geus aya ti jaman prasejarah, dipaké ngaran ratu, Ratu Galuh nu ngadegkeun karajaan di Lakbok sanggeus meruhkeun raja Siluman. Ratu Galuh pindah ka Lakbok lantaran karajaanana kaléléb ku cai laut.
Lolobana dina dongeng
Pangna Karajaan Galuh jeung Kabupaten Galuh kungsi kamashur, ieu sigana ngalap kana harti kecap galuh. Poerbatjaraka dina Majalah Bahasa dan Budaya kalayan judulna Galuh (taun III, No. 2, Desember 1945). Ceuk Purbacaraka galuh hartina putri menak jeung dewi. Dina basa Sansakerta kapanggih kecap galu nu hartina batu inten permata.
Baca Juga: Prabu Nusia Mulya Dua Welas Taun Mertahankeun Pakuan Pajajaran
Dina Kamus Umum Bahasa Indonesia, Purwadarminta disebutkeun kecap galuh kaasup istilah kesustraan lama nu hartina ‘ratna’ (inten); ‘putri’ (anak awwewe raja). Kamus Kawi-Balinese-Nederlandsch Woordenboek (van der Tuuk), oge nerangkeun galuh ngandung harti putri raja jeung permata atawa inten (ratna).
Ti baheula kecap galuh dilarapkeun keur ngaran wanoja. Dina cerita Cerita Panji aya ngaran Dewi Galuh Candrakirana, dina Cerita Panji-Melayu oge aya ngaran Galuh Ajeng. Di Banjarmasin, Kalimantan, kecap galuh dipake keur nyalukan budak awewe, kawas “neng” dina basa Sunda. Majan kitu di Jawa galuh oge dipake keur ngaran lalaki.
Kecap galuh oge dipake keur ngaran karajaan, tapi dina babad, ari babad kaasup dongeng, lain fakta sejarah, ku kituna teu bisa dijieun fakta sejarah, beda jeung prasasti atawa naskah nu ditulis dina sajaman. “Ngaran Karajaan Galuh ampir aya di unggal babad,” ceuk Undang Ahmad Darsa, filolog ti Unpad Bandung.
Dicontokeun dina Serat Babad nomer 1 nu diteundeun di Pusat Pembinaan dan Pengembangan Bahasa, nyaritakeun perang antara raja Banjaransari jeung raja (jin) awewe di Galuh. Conto sejenna dina Babad Tanah Jawi, disebutkeun galuh teh karajaan Arya Bangah, ieu babad aya patalina jeung Kamandaka.
Baca Juga: Salasahiji Keris Gagaman Pangeran Diponegoro, Keris Naga Siluman
Serat Aji Saka, di antarana nyaritakeun Dewata Cengkar ngarurug Nagri Galuh, ngan Nagri Galuh ujug-ujug leungit, robah jadi leuweung. Undang Ahmad Darsa nyebutkeun dina Carita Parahyangan (CP), disebutkeun Galuh teh nagri Raja Sanjaya. “CP oge saenyana kagolongkeun kana dongeng nu deukeut kana bener,” pokna.
Kecap galuh nu kuat derajat kasajarahanana, derajat bahan epigrafina penting pisan mungguh sejarah, ceuk Undang Darsa, aya dina batutulis nu aya di Desa Gandasuli, Kedu. Ngan dina eta prasasti kecap galuhna make awalan pra: Pragaluh. Ieu prasasti ti barang dijieun tepi ka danget masih tetep di tempatna.
Ujung Galuh
Ngeunaan tempat nu ngaranna Ujung Galuh di Jawa Timur, ceuk Poerbatjaraka, ampir geus jadi kasapukan umum Ujung Galuh teh Ujung (palabuhan atawa bandar) di Surabaya. Ngaran lengkepna: Ujung Perak nu saterusna diganti jadi Tanjung Perak, lantaran hayang ngimbangan Tanjung Pariuk di Jakarta.
“Jadi, Ujung Galuh ngandung harti Ujung (Tanjung) Perak,” ceuk Undang Darsa. Tanah, daerah, atawa negeri Galuh bisa dihartkeun tanah, daerah, atawa negeri perak. Di dieu Galuh dihartikeun perak. Undang Darsa nyebutkeun galuh oge disebut-sebut dina Nagara Kretagama, pupuh ka-78 pada ka-5.
Baca Juga: Barendelan Lululuhur Ciamis jeung Tasikmalaya, Luluhur Satempat jeung Satingkat Raja Wilayah
Di ieu buku susunan Mpu Prapanca teh disebutkeun Galuh teh desa merdeka agama Wisnu nu teu jauyng jeung Dakulut. Dina basa Sunda mah Dayeuhkolot. Dayeuh atawa kota nu ditinggalkeun, panguasana pindah ka tempat sejen saperti bupati Bandung nu mindahkeun puseur dayeuhna di Dayeuh kolot ka Kota Bandung ayeuna.
Dina Pararaton dipedar Ujung Galuh teh tempat numpi Jayakatwang, raja Kediri. Ujuang Galuh oge dipake numpi ku Wijaya, raja munggaran Majapahit. “Galuh bener-bener kaunggel dina ilmu bumi di Tanah Jawa nyampak dina karangan C.M. Pleyte, nu nyebutkeun Galuh ayeuna mah Ciamis,” ceuk Undang Darsa.
Kumaha ngeunaan Karajaan Galuh Pakwan? Undang Darsa nyebutkeun Poerbatjaraka nyutat katerangan Pleyte nu nulis: “De handeling (van Loetoeng Kasaroeng) valt voor is Pasir Batang anoe girang, het voormalige rijk van Galoeh, het welk omvatte Banjoemas, Zuid-Tjirebon en de Oost-Preanger‘
Hartina: Lalakon Lutung Kasarung kajadianana di Pasir Batang nu luhur, nyaeta di Karajaan Galuh nu jaman baheula nagwengku Banyumas, Cirebon Kidul jeung Priangan Wetan. Poerbatjaraka nyindekeun sakabeh daerah alir sungai Begawan-Serayu-Citanduy, asupna kakuwasaan Kerajaan Galuh nu pusatna di daerah Ciamis ayeuna.***