Network
GALURA -Ku masarakat disarebut situs Batu Kalde. Ceuk Pusat Penelitian Arkeologi Nasional (Puslit Arkenas), situs Batu Kalde nu pernahna di Pananjung Kabupaten Pangandaran teh titinggal jaman prasejarah jeung jaman sejarah.
Bisa dicindekeun Batu Kalde titinggal jaman prasejarah jeung jaman sejarah teh sabada Puslit Arkenas ngayakeun panalungtikan di tempat ayana Batu Kalde, di Pananjung Pangandaran.
Puslit Arkenas, taun 1985 jeung taun 1987 ngayakeun panalungtikan arkeologi di Batu Kalde di Pananjung, Pangandaran, harita mah kaereh keneh ka Kabupaten Ciamis.
Baca Juga: Gedong Sate cenah mah Diadegkeun dina Lahan Urut Karaton, Karatonna Mindeng Kawenehan
Memeh Puslit Arkenas miang ka Batu Kalde di Pananjung Pangandaran, masarakat manggih balok batu, boh nu pasolengkrah boh nu kasaeur taneuh.
Lantaran lain sabatu-batuna, papanggihan masarakat Pananjung Pangandaran dilaporkeun ka Dinas Pendidikan dan Kebudayaan (P&K) Kabupaten Ciamis.
Ku Dinas P&K Kabupaten Ciamis terus dilaporkeun deui ka tingkat pusat, ka Departemen Pendidikan dan Kebudayaan (Depdikbud). Jaman harita Arkenas ngindung ka Depdikbud.
Hasil panalungtikan di tempat kapanggihna balok batu di Pananjung Pangandaran, Arkenas nyindekeun, di eta tempat, baheulana kungsi ngadeg struktur bangunan nu diduga aya patalina jeung agama Hindu.
Baca Juga: Mataram Kungsi Sisirikan ka Banten, Pedah Raja Banten Dileler Gelar Sultan ku Raja Arab
Nu matak ku Arkenas mah dingaran Candi Pananjung, nyokot ngaran tempat ngadegna candi. Ku masarakat mah salian disarebut Batu Kalde oge disebut Candi Chanda Wesi.
Di sabudeureun situs Batu Kalde aya arca Nandi, jeung pedestal buleud di luhureun batu pasagi. Eta batu, teu bisa dileupaskeun tina wangunan candi.
Lian ti eta kapanggih yoni nu bagean luhurna geus ruksak, ayana yoni ngandung harti samemeh sumebar agama Hindu jeung Budha di dinya geus jadi tempat ibadah.
Yoni teh titinggal jaman prasejarah ari candi titinggal jaman sejarah. Nu matak Batu Kalde the titinggal jaman prasejarah jeung jaman sejarah.
Baca Juga: Palabuan-Palabuanna Ngarangrangan, Karajaan Sunda Jadi Hengker
Dumasar pamanggih tim ekskavasi Arkenas, wangunan nu kungsi aya di dinya teh ukuran 12 x 12 meter. Tapi teu kawas candi di Jawa Tengah atawa Jawa Timur. Bisa dicindekkeun kitu ditempo tina struktur wangunan, jenis batu jeung jerona pondasi.
Arkenas nyatet bangunan nu tadina diduga candi ukuranana 12 meter ka 12 meter, pasagi. Bagéan sesa-sesa bangunana ukur tilu lapis batu. Tacan bisa ditangtukeun ka mana eta bangunan nyanghareupna.
Mun téa mah aya hateupan, bisa jadi hateupna dijieun ku bahan nu gampang ruksak, injuk atawa bahan sejenna nu teu kuat lila. Tihangna bisa jadi tina kai atawa awi.
Candi di Pananjung atawa situs Batu Kalde, kungsi dianjangan ku Bujangga Manik, nu kungsi dua kali nguriling Pulo Jawa jeung Bali dina abad ka-15 Masehi.
Balik ti wetan anu kaduakalina Bujangga Manik nyimpang ka desa nu ngaranna Pananjung, teu jauh ti Laut Kidul. Lantaran Bujangga Manik teh pendeta, nalika nyimpang harita, ngahaja reureuh jeung muja di dinya samemeh neruskeun lalampahanana ka kulon.***
