Kampung Kuta, Bolay Dijadikeun Puseur Karajaan Galuh, Alatan Raja Teu Bisa Asup ka Patang Ngewu Domas

Tacan jentre naon maksudna Sultan Cirebon ngutus opat urang keur ngababakan di Kampung Kuta.

Kasebutna kampung adat, masarakat Kuta masih tetep tuhu nyekel adat, di antarana teu meunang ngaruksak Leuweung Ageung, malah nyokot pangpung oge teu meunang, ulah nyieun imah ku tembok, jeung teu meunang nanggap wayang, boh wayang golek boh wayang kulit.

Sagala pantrangan di Kampung Kuta teh mun ditafakuran mah taya lian ti keur kapentingan nu nyicingan jeung kapentingan alam katut lingkungan.

Baca Juga: Patilasan Eyang Dalem Arya Kancana di Cibangban Desa Bunter Aya Patalina jeung Prabu Niskala Wastukancana

Imah kudu panggung, apan Kuta mah mah wewengkonna pasir nu tarahal, imah teh bisa disebutkeun seseleke dina tonggong pasir.

Nyieun imah sabisa-bisa ulah ngarobah bentuk beungeut taneuh, ngalelemah rada dipahing lantaran matak ngaganggu kakuatan taneuh.

Ulah ngaganggu leuweung, eta teh keur sasadiaan cai jeung sangkan alam katut lingkungan ulah ruksak. Pangpung nu ulah dicokot, agehaneun mahluk sejen, rinyuh upamana jeung keur gemuk.

Najan kitu, Kampung Kuta lain hartina nolak kana kamajuan jaman. Eusi wangunan imahna mah kawilang geus modern. Alatan listrik geus asup, kulkas, teve, parabola, magic jar jeung barang-barang elektronik sejenna.

Atuh mun peuting caang nebra ku lampu neon nu dipasang di sisi jalan. Nu geus barogaeun motor, mobil oge aya.

Pangeusi Kampung Kuta bisa disebutkeun teu pati gegek. Ieu kampung adat nu legana 97 hektar, kaasup Leuweung Ageung jeung pasawahan 30 hektar, ¬dieusian ku 326 urang tina 138 umpi, kabeh oge ngagem agama Islam.