“Tujuanana?”
“Pan Kawali teh tempat asal luluhurna.”
“Kitu? Yap atuh asup ka saung,” ceuk Suba.
“Di dieu wae,” ceuk urang Dayeuhluhur bari diuk dina golodog. “Aeh, ari dia di dieu jeung saha? Sorangan?” pokna deui.
“Sapopoena mah duaan jeung aki uing. Ngan mindeng loba nu ka darieu, malah rea nu mondok,” ceuk Suba.
“Aki dia ka mana ayeuna?”
“Ka lebak, ka Sipatahunan. Ngomongna rek mandi jeung rek ngala cai. Tadi di lebak henteu nempo?”
“Henteu, kami teu nyimpang heula ka situ, langsung ka dieu,” tembal eta lalaki.
“Teu pasarandog di jalan?”
“Henteu,” walon eta lalaki bari mencrong ka lebah paranti mujasmedi. “Meunang kami ka ditu?” pokna deui bari nunjuk ka tempat mujasmedi.