Network
GALURA – Tiheula, waktu mahabu sasalad korona taun 2020-2022, bahan utama produksi tahu nyaeta kedele, nya mahal nya langka.
Ayeuna, paekonomian geus mimiti nguliat deui, tapi harga kedele masih kawilang mahal, matak jangar nu arusaha produksi tahu.
Keur kaayaan normal, samemehna, harga kedele Rp8 rebu sakilo, kiwari Rp12 rebu sakilona.
“Poe ieu aya kabar cenah harga kedele bakal undak Rp12,5 rebu sakilona,” ceuk Wahid (42), manajer produksi Pabrik Tahu “Mekar Jaya.”
Pabrik Tahu “Mekar Jaya” ayana di Kampung Cisasawi, Desa Cihanjuang, Kacamatan Parongpong, Kabupaten Bandung Barat.
Waktu dikolongan di pabrikna, Minggu, 5 Maret 2023, Wahid, mertelakeun, disatengahing mahalna harga kedele, manehna saparakanca ukur bisa bertahan.
“Horeng, ayeuna mah tahu teh geus ‘teu deui hipu’...” pokna.
Samemehna, keur kaayaan normal, kedele can langka jeung mahal balukar sasalad korona, “Mekar Jaya” dina sapoena mampuh ngahasilkeun 4 kintal tahu.
Dipasarkeun ka Pasar Antri, Kota Cimahi, jeung ka Pasar Lembang, Kabupaten Bandung Barat.
Balukar sasalad korona, produksi tahu nyirorot jadi 2 kintal sapoena, katambah keur usum langka kedele mah jadi sakintal sapoena teh.
“Tangtu wae mangaruhan kana beubeunangan nu oge tuluy nyirorot,” ceuk Wahid.
Tah, ngungkulan eta kaayaan, kapaksa manehna ngaleutikan ukuran tahuna.
Aya 3 jenis ukuran tahu, samemehna 7 cm x 7 cm, 10 cm x 10 cm, jeung 13 cm x 13 cm. Ayeuna, ngaleutikan jadi 5 cm x 5 cm, 8 cm x 8 cm, katut 10 cm x 10 cm. Sakeureutna teh variatif hargana, mimiti Rp400 tepi Rp700.
Anapon tina sakintal kedele, rata-rata ngahasilkeun tahu 7 rebu keureut.
Lamun kedele keur normal, teu mahal jeung teu langka tea, “Mekar Jaya” mampuh meuli 4 kintal kedele sapoena.
“Ayeuna mah sapoena ukur bisa meunangkeun kedele sakintal. Eta ge sakapeung pangiriman kedele ti Pasirkoja teh teu lancar, nu jadi matak ngaganggu kana jadwal produksi,” pok Wahid.
Kitu deui beubeunangan nu garawe di “Mekar Jaya” ge ngurangan. Aya 6 urang nu digarawe di ieu pabrik tahu, satadina sapoena meunang Rp150 rebu, ayeuna mah jadi Rp100 rebu sapoena.
Ceuk Wahid, sababaraha babaturanana papada pangusaha tahu, aya nu kapaksa ngajual motor jeung mobilna pikeun nutupan ongkos produksi.
“Samalah, oge aya nu kapaksa nutup usahana,” pokna deui.
Sajeroning kitu, sual proses nyieun tahu, manehna ngeceskeun, dimimitian ku ngumbah jeung ngeueum kedele. Laju digodod, disaring tur dicitak, tepi ka dikeureutna.
Warna tahu make koneng. Lian ti make suluh keur pameuleumanana, sababaraha tungku katel jangeun ngagodog tea make mesin uap nu ngahasilkeun panas.
Unggal poe, produksina mimiti tabuh 03.00, rengse kira tabuh 14.00. Laju tabuh 20.00 dipasarkeun ka pasar-pasar nu geus jadi langgananana.
Pabrik Tahu “Mekar Jaya” teh ngadeg taun 1990. Wahid miharep malar pamarentah geura-geura ngungkulan mahalna harga kedele.
“Sabab kedele teh minangka bahan baku utama industri pangolahan tahu. Mun bisa mah harga kedele teh Rp10 rebu sakilona atawa handapeun eta. Salila ieu kuring ukur bisa bertahan. Duka enjing pageto mah,” pokna.***
