GALURA - Asupna Gubernur Jawa Barat Ridwan Kamil alias Kang Emil ka Partai Golkar tetela meunang pangajen ti juru titen pulitik.
Eta lengkah Kang Emil ka partey nu lambangna caringin teh merenah tur strategis kacida. Lain wae keur Kang Emilna wae, tapi deuih keur Partai Golkar.
Eta hal upamana wae ditepikeun ku juru titen pulitik Universitas Islam Internasional Indonesia (UIII) Philips J Vermonte sakumaha anu dicutat ti Antara.
Kang Emil, sakumaha anu diwartakeun resmi ngagabung ka Partai Golkar Rebo 18 Januari 2023 di Jakarta.
Gabungna Kang Emil diresmikeun ku acara khusus ku Ketua Airlangga Hartarto di Kantor DPP Partai Golkar Jakarta, kalawan diluuhan ku gegeden DPP Partai Golkar.
Kang Emil dibere kartu anggota, jeket koneng jeung langsung meunang tugas beurat, jadi Wakil Ketua Umum Bidang Penggalangan Pemilih dan co-chair Badan Pemenangan Pemilu (Bappilu) Partai Golkar.
Baca Juga: Leuweung Jahim, Wisata Alam Pagunungan Ciamis Kalér
Nurutkeun Philips J Vermonte, lengkah Kang Emil ngagabung ka Golkar teh merenah jeung strategis keur duanana.
Kang Emil diirong bisa mere warna ka Golkar enggoning ngajalankeun fungsina sabagai paniten, nu nyieun undang-undang jeung nangtukeun anggaran.
Nyabit soal latar tukang Kang Emil sabage eksekutif jeung arsitek, cek Philips J Vermonte oge gede mangpaatna keur Golkar.
Baca Juga: Batu Akik Kungsi Ngajaul, Saban Daerah Miboga Potensi Batu Akik Disungsi
Eta kamampuh Kang Emil teh bisa ngundakkeun daya tawar Golkar dina sagala urusan pamarentahan.
"Pangalaman Kang Emil bakal nambahan kamampuh Golkar pikeun jadi partey teknokrat sakumaha udagan Golongan Karya," cek Philips J Vermonte.
Husus keur diri Kang Emil, asupna ka Golkar teh, nurutkeun Philips J Vermonte alus keur karir pulitikna.
Baca Juga: Batu Ali Masih Keneh Rea Nu Mikaresepna, Hiji Batu Ali Aya Nu Meuntas Sajuta Rupia
Teu mustahil, Kang Emil bisa kawas Presiden Joko Widodo nu gede di daerah terus moncorong di nasional.
Cek Philips J Vermonte, Presiden Joko Widodo teh minangka "anak kandung" desentralisasi, atawa sabaga presiden buah tina desentralisasi.
Kang Emil oge bisa wae kitu.
Baca Juga: Camat Margaasih: ku Rembug Bedas Warga Bisa Langsung Ngangluh ka Bupati
Kang Emil lahir tina otonomi daerah. Mimitina kapilih jadi walikota, terus gubernur. Ka hareup, sabada gabung ka pulitik, teu mustahil bakal jadi pamingpin nasional oge.
"Ieu nambahan stok calon pamingpin nasional nu asalna kapala daerah," pokna.
Kituna teh bari nambahan yen kaputusan Ridwan Kamil dibaju parpol teh geus luyu jeung jalur sarta aturan konstitusional, utamana mun hayang miluan kontestasi di level nasional.
Baca Juga: Kiwari Dibaekeun, Konservasi Alam ku Karuhun Sunda Dipentingkeun pisan
"Asup parpol teh konsekuensi logis Ridwan Kamil sabagai hiji kapala daerah nu nurutkeun hasil survey mibanda popularitas jeung elektabilitas hade, boh keur kandidat calon presiden boh wakil presiden," pokna deui.***