Network
“AKA, kami kaluar heula. Aka mah sare, ke janari gantian, kami nu sare,” ceuk Rait, terus cengkat.
“Rek ngaronda, nyah?” ceuk Paman bari seuri.
“Kami ngestokeun pancen,” tembal Rait.
“Hade,” tembal Paman deui bari peureum hayam. “Ari batur dia nu dua deui ka mana?” ceuk Paman nanya ka Bena sanggeus Rait turun kana golodog.
“Kami tacan meunang laratan deui,” tembal Bena,” ngan kawasna mah geus ti heula, bareng jeung tilu urang baturna, ngan kami teu wawuh.”
“Apal ti mana?”
“Kungsi tepung di warung,” ceuk Bena.
“Tong hariwang, engke oge bareng deui.”
“Paman wawuh jeung Olot Kaya,”
“Wawuh, ngan teu loma. Meujeuh tah Perebu ngahiras Olot Kaya sina nganteur.”
“Kumaha kitu?”
“Loba luang jeung pangalamanana.”
“Kanuragaanana deuih.”
“Geus karuhan eta mah,” tembal Paman bari angger peureum hayam. “Dia, arek terus dumuk di Kawali atawa rek balik deui ka kulon?”
“Kawasna mah tuluy matuh di Kawali.”
“Anu lianna?”
“Sarua. Moal aya nu balik deui ka kulon, najan sarerea oge hayang mulang. Hayang nepi ka tutug bumela, ngan, ceuk Olot Kaya, ulaheun ku Kangjeng Perebu.”
“Apan kami oge kalah ka dititah ka Sumedanglarang. Padahal di kulon keur merelukeun pisan tanaga. Kangjeng Perebu mikirna panjang, Pajajaran ulah tepi ka tumpur, kudu aya nu melak sirung-sirung Pajajaran di tempat sejen. Mun kabeh tumpur, lalakon Pajajaran bakal lekasan, moal aya nu neruskeun,” ceuk Paman.
“Nyakseni,” tembal Bena.
“Geura reup peureum, isuk-isuk kudu miang deui,” ceuk Paman.
Tadina Bena rek nanyakeun saha sabenerna “paman” teh. Ngan teu wanieun.
*
“KAMI amit, Paman,” ceuk Putri Anjungsari memeh mancal kana kudana. Harita teh rebun-rebun keneh pisan, carangcang tihang oge acan. Anu disebut paman nangtung sisi golodog, kitu deui nu tiluan. Sirah opatanana angger ngeluk, teu wanieun neuteup ka Putri Anjungsari. Bena jeung Rait narangtung bari nyekelan tali eles kudana sewang-sewangan, teu jauh ti Putri Anjungsari.
“Bral, muga waluya di jalan,” tembal paman bari sorana dumareuda. Nalangsa, sedih, ngarasakeun Pajajaran tepi ka paburencay. “Hampura Paman teu bisa nganteur tepi ka ditu.”
“Ku dijagana jajalaneun, kami kacida nganuhunkeunana, Paman,“ ceuk Putri Anjungsari bari mancal kana kudana.
Bena jeung Rait oge marancal kana kuduana sewang-sewangan.
“Amit Paman. Muga bisa tepung deui,” ceuk Putri Anjungsari bari ngenyed tali eles kudana.
Beretek kudana lumpat, dituturkeun ku Bena jeung Rait. Lalaki nu disebut paman ku Putri Anjungsari saacan kuda katempo mah angger nangtung bari neuteup kuda nu dilumpatkeun. Sanggeus teu katempo, paman ngoreleng ka pipir imah, nyokot kudana. Clak ditumpakan, biur dilumpatkeun, ka kaler, mapay jalan satapak.
Sabot ngalumpatkeun kudana, Bena jeung Rait masih keneh panasaraneun saha nu disebut paman ku Putri Anjungsari teh. Anu geus bisa kabade mah: paman sarua lunta ti Pajajaran bari mawa lambang karajaan, sina dumuk di Sumedanglarang. Anu jadi panasaraneun deui: rek dipasrahkeun ka saha eta lambang karajaan teh?
Kawantu jalanna ngabalungbung jeung teu ngaliwat ka pilemburan, kuda lumpatna tarik, siga nu keur balap wae. Keur ngaberengbeng lumpat, ti kajauhan katempo, handapeun tangkal caringin aya dua kuda nu keur nyatuan jukut dina kuta sisi jalan. Tapi Putri Anjungsari henteu ngendorkeun kudana, angger dilumpatkeun.
Basa geus rek deukeut ka lebah kuda, mucunghul dua urang, wanoja jeung lalaki, sarta tiluanana terus nangtung deukeut kuda. Panonna malencrong ka lebah Putri Anjungsari. Bena gancang miheulaan Putri Anjungsari, bisi nu keur narangtung boga niat teu hade. Kudana dikendoran, diturutan ku Putri Anjungari jeung Rait.
“Amit, kami milu liwat,” ceuk Bena waktu ngaliwat ka hareupeun nu tiluan.
“Eureun heula ki Silah,” tembal salasaurang ku sora nu rada tarik.
“Kami rusuh,” tembal Bena, bari ngenyed eles kudana sangkan lumpatna ngabelesat deui.
Kawasna ngarasa panitahna teu digugu, nu duan mancal kana kudana. Ngudag. Nempo nu duaan ngudag. Putri Anjungsari mere tanda sangkan eureun heula. Tiluanana nyarisi, eureunna di kuta. Teu lila oge ku nu duaan kasusul.
“Daria rek ka marana?” ceuk nu lalaki.
“Ka wetan,” tembal Bena.
“Ka wetanna ka mana?” ceuk nu lalaki deui.
“Ka Kawali,” tembal Bena.
“Ka Kawali? Asal ti mana?“
“Ti Kulon.”
“Pajajaran?”
“Mun enya kumaha?” Putri Anjungsari nu nembalan ku sora asli.
“Tadi peuting ngarereb di mana?”
“Di omah nu teu pati jauh ti dapuran haur gereng,” tembal Putri Anjunsari bari mencrong eta lalaki, seukeut pisan.
Eta lalaki ngabalieur, terus tungkul, teu wanieun nadah sorot panon Putri Anjungsari. Sajongjongan taya nyarita.
“Andika naeunana Jaya Perkosa?” ceuk nu lalaki bari ngareret ka Bena, ngan ari nanya mah ditujukeun ka Putri Anjungsari.
Barang ngadenge Jaya Perkosa disebut ku eta lalaki, Bena jeung Rait helokeun. Geuning nyahoeun ka Jaya Perkosa? Dirina oge ukur ngadenge ngaranna, tacan kungsi panggih. Padahal ti barang dibrolkeun tepi ka jebrog, teu kungsi incah balilahan ti Pakuan Pajajaran, karek ayeuna lunta ti puseur dayeuh Karajaan Sunda teh, eta oge pedah diparentah ku raja.
“Dia wanoh?” Putri Anjungsari malik nanya.
“Kami aya di dieu diparentah ku inyana,” ceuk nu lalaki.
“Tujuanana...? Megat kami?” ceuk Putri Anjungsari deui.
“Lain rek megat arandika,” tembal eta lalaki. “Kami ngajalankeun pancen ti inyana.”
“Sangkan kami teu meunang bancang pakewuh?” ceuk Putri Anjungsari.
“Teu salah,” tembal nu lalaki.
"Naha atuh megat kami?" ceuk Putri Anjungsari.
"Pedah ngan duaan. Iber nu katampa ku kami limaan."
"Anu duaan deui mah ti heula."
“Pangira kami teu misah. Hampura," ceuk eta lalaki mamandapan.
"Teu nanaeun, Ki Silah," tembal Putri Anjungsari. "Kami rek miang deui.”
“Mangkade sing ariatna di jalan,” ceuk nu lalaki. Ari nu awewe mah tacan ngomong sakemek oge. Ngan katempoeun ku Putri Anjungsari, eta awewe sabaraha kali ngareret ka Bena, ngan Bena mah teu engeuheun lantaran panonna teu weleh manco ka nu lalaki. Ari Rait luak-lieuk ka sabudeureunana.*** Nyambung
