Network
GALURA.CO.ID –Dina raraga mieling Hari Bhayangkara ka-78, Polres Majalengka ngagelar Open Turnamen Bola Voli Kapolres Majalengka Cup Tahun 2024 di GGM Talaga Manggung, Majalengka pada Saptu (22/6/2024) peuting.
Ieu turnamen nu diilun ku 10 tim ti wilayah Majalengka jeung sabudeureunana teh lumangsung gumebyar jeung pinuh sumanget.
Pamilon turnamen: Tim Satpol PP Majalengka, Tim Polres Indramayu, Tim Bhayangkara Presisi Polres Majalengka, Tim Riyano Jaya, Tim Yonif 321 Galuh Taruna, Tim Simajaya, Tim Kodim 0617 Majalengka, Tim Udi Rotan, Tim PT KSM Margamukti, jeung Tim The Black.
Tim Udi Rotan nyangking juara kahiji, disusul ku Tim Polres Indramayu di posisi kadua. Juara katilu dicangking ku Tim PT KSM Margamukti, ari posisi kaopat dicangking ku Tim Riyano Jaya.
"Nyangking juara kahiji teh ieu hasil perjoangan sakumna tim sarta rojongan ti nu nongton. Simkuring saparakanca ngaraos reueus wangsul tiasa nyandak trofi juara, kahiji," ceuk kapten Tim Udi Rotan
Kapolres Majalengka, AKBP Indra Novianto, S.I.K., M.H., M.Si., CPHR., diwakilan ku Ketua Panitia Kapolres Cup sakaligus Kasi Propam Polres Majalengka, AKP Sarjiyo, S.E., M.H., ngawilujengkeun ka sakumna nu juara sarta ngaapresiasi ka sakumna tim anu geus milu aub.
"Polres Majalengka kacida reueusna kalayan sumanget sportifitas tur kebek sumanget nu ditembongkeun ku sakumna tim," ceuk Kasi Propam.
"Wilujeng kangge sakumna nu juara, pamugi ku ieu kagiatan tambih ngaraketkeun kakaluwargaan sarta sumanget sauyunan," ceuk AKP Sarjiyo.
Open Turnamen Bola Voli Kapolres Majalengka Cup dipiharep bisa jadi agenda taunan.*** Ayank R Sambara
