Network
GALURA.CO.ID -Bupati Bandung, Dadang Supriatna, jadi Inspektur Upacara Pangbagèa Purna Tugas Satgas Pamtas Mobile Yonif 330/Tri Dharma taun 2024 di Lapangan Yonif 330/Tri Dharma Nagreg Kabupaten Bandung, Kemis, 28 Marer 2024, kamari.
Ieu upacara dina raraga ngabagèakeun datangna Satgas Pamtas Mobile Yonif 330/Tri Dharma nu samèmèhna ngalaksanakeun tugas di Kabupaten Intan Jaya Papua.
"Mancèn tugas salami 9 sasih, ti Juni 2023 dugi ka Maret 2024. Satgas Pamtas Mobile Yonif 330/Tri Dharma mancèn tugas kalayan saè. Ieu kacida luar biasa, angkat 450 urang pasukan mulih deui lengkep 450 urang pasukan," ceuk Bupati Bandung.
Baca Juga: Dina Rembug Bedas, Kepala Desa Lampegan Miharep 13 Program Prioritas Bupati Bandung Nuluy
Dina tugas di Kabupaten Intan Jaya, ceuk Dadang, Satgas Pamtas Mobile Yonif 330/Tri Dharma tèh prestasina bisa nyangkalak hirup-hirup sababaraha anggota Kelompok Kriminal Bersenjata (KBB) nu di antarana kurir penyelundup senjata.
"Naon nu dipilampah anggota KKB ieu ngabungahkeun nagara urang. Sajaba ti kitu, Satgas Pamtas Mobile Yonif 330/ Tri Dharma ogè ngancurkeun markas-markas ni dijadikeun tempat transit KKB sareng hasil meruhkeun puluhan anggota KKB. Nu utami mah tiasa ngawujudkeun kondusifitas kaamanan di wilayah Kabupaten Intan Jaya Papua," ceuk Dadang Supriatna.
Iwal ti kitu, ceuk Dadang Supriatna salila ngajalankeun tugas aya sababaraha inovasi nu bisa ngahudangkeun sumanget: ngahijina warga negara Indonesia nu aya di Papua jeung Satgas Pamtas Mobile Yonif Para Raider 330/Tri Dharma.
"Ieu kacida luar biasa, nu antukna babarengan pikeun tetep ngajaga teritorial dilakukeun sasarengan antawis masarakat Kabupaten Intan Jaya Papua sareng Yonif 330/Tri Dharma. Wilujeng kanggo Yonif 330/Tri Dharma," ceuk Bupati Bandung.
Dadang Supriatna ngarasa reueus. Inyana nganuhunkeun jeung ngaprestasi kana kasuksesan Satgas Pamtas Mobile Yonif 330/Tri Dharma.
