Network
GALURA.CO.ID - Pamarèntah geus netepkeun 1 Romadon 1445 H/2024 M ninggang di poè Salasa, 12 Maret 2024. Dumasar kaputusan sidang isbat, di Kantor Kementerian Agama (Kemenag) di Jakarta, Ahad, 10 Marer 2024 kamari. Ari Muhammadiyah mah ngamimitian puasa Romadon poè ieu, Senèn , 11 Maret 2024.
Sidang isbat dipingpin ku Menteri Agama RI, Yaqut Cholil Qoumas. Sidang sapuk kana kaputusan 1 Romadon ninggang di Salasa, 12 Maret 2024 lantaran dua hal. Kahiji: sidang geus ngadèngè katerangan Tim Hisab Rukyat Kemenag nu nètelakeun luhurna hilal di sakuliah Indonesia aya di luhur ufuk kalawam luhurna antara - 0° 20‘ 01“ (-0,33°) tepi ka 0° 50‘ 01“ (0,83°).
Sudut elongasi antara 2 derajat 15 menit 53 detik tepi ka 2 derajat 35 menit 15 detik. Ku kituna, secara hisab posisi hilal di Indonesia waktu sidang isbat awal Romadon 1445 H, can asup kriteria bulan anyar nu ditetepkeun MABIMS (Menteri Agama Brunei Darussalam, Indonesia, Malaysia, jeung Singapura).
Dina taun 2021 Menteri Agama anggota MABIMS nyatujuan kriteria anyar nyaèta luhur hilal 3 derajat jeung elongasi 6,4 derajat. Ku posisi kitu, ceuk Menteri Agama, sacara sastronomis atawa hisab, hilal teu dimungkinkeun katingali.
Hal ieu kakonfirmasi ku pamanggih nu rukyah nu diturunkeun Kemenag. Tina 134 titik rukyah nu ditempatkeun di sakuliah Indonesia, ti Aceh tepi ka Papua teu aya hiji ogè nu bisa ningali hilal.
Najan pamarèntah netepkeun 1 Romadon ninggang di poè Salasa, 12 Marer 2024, saluyu oge jeung NU jeung Persis, ngan Muhammadiyah mah geus nangtukeun 1 Romadon tèh ninggang di poè Senen, 11 Maret 2024. Kituna tèh, sabab Muhammadiyah makè perhitungan merode hisab wujudul hilal, nu teu ngudukeun posisi hilal 3 darajat, najan 0,1 ogé geus dianggap asup bulan anyar.
Ku aya panetepan awal Romadon bèda, Menag nètèlakeun, hal nu wajar, ulah tepikeun ka ngaganggu ukhuwah atawa duduluran. Sanajan bèda dina panangtuan 1 Romadon, tapi Idul Fitri, 1 Syawal 1445 H taun ieu mah antara Kemenag, NU, Persis jeung Muhammadiyah tèh bareng ninggang dina poè Rebo, 10 April 2024.*** Sopandi
