Network
GALURA.CO.ID- PT. Pupuk Indonesia (Persero) nyalurkeun gemuk 250 ton gemuk jenis urea jeung NPK pikeun patani di Kabupaten Kuningan, di gudang pupuk, anu perenahna di Desa Pasayanagn, Kecamatan Lebakwangi, Salasa, 6 Pebruari 2024.
Ceuk Senior Vice Presiden (SVP) Strategi Pemasaran Pupuk Indonesia, Iyan Fajri, gemuk anu anu disalurkeun ka para patani di Kuningan teh lain gemuk subsidi, tapi haregana leuwih handap atawa murah batan gemuk anu biasa di jual di kios-kios atawa toko gemuk.
Iyan nyebutkeun, 50 Kg gemuk jenis urea jeung NPK hargana Rp 270 rebu. Lamun meulina di toko Rp 450 rebu, geseh meh 40 persen.
Kituna teh ku sabab, pihakna miboga tujuan pikeun ngadeudeul para patani anu henteu kabagean jatah subsidi gemuk ti pamarentah.
Nurutkeun Iyan, PT. Pupuk Indonesia rukun gawe reujeung Dinas Ketahanan Pangan (Diskatan) Kabupaten Kuningan, nyebarkeun 5000 kupon ka para patani anu aya di Kabupaten Kuningan pikeun meuli gemuk.
“Saurang patani kabagean hiji kupon pikeun nebus gemuk, saratna foto copy KTP. Eta kenging jatah kanggo dua jenis pupuk, di luar harega normal,” ceuk Iyan.
Sajeroning kitu, Kepala Dinas Ketahanan Pangan dan Pertanian (Diskatan) Kabupaten Kuningan, Wahyu Hidayah, miharep penjualan pupuk lain subsidi di sahandapeun harga normal pasar, bisa ngabantu patani anu henteu nampa fasilitas subsidi.
“Gemuk subsidi semet kanggo salapan komoditas. Komoditas sanesna, nya tiasa kacumponan ku gemuk anu haregana mirah,” ceuk Wahyu.
