Network
GALURA-Panitia Pengawas Pemilu (Panwaslu) Kecamatan Cigugur, geus mufakat reujeung Panitia Pemilihan Kecamatan (PPK), pon kitu unsur muspika kecamatan millih tempat atawa lokasi pikeun neundeun logistik Pemilu 2024, di Gedong Serbaguna Desa Cisantana.
Eta lokasi kawilang merenah jeung aman pikeun neundeun logistik kawas kotak suara, surat suara jeung logistik sejenna anu baris didistribusikeun ku KPU Kabupaten Kuningan Kuningan, elatna 5 poe samemeh lumangsung pemilu.
Ketua Panwaslu Kecamatan Cigugur, Dadang Setiawan, nyebutkeun pihakna tangtu ngutamakeun dina pangawasan pendistribusian logistik teh.
Eta ku sabab penting anu kudu dijaga kaamananna, dina nunjel kalancaran pamungutan sora sakumaha mistina.
“Upamina wae hujan, tangtos nyimpen logistik teh di tempat anu henteu bocor. Henteu nempatkeun logistik di tempat anu sepi, kanggo nyinglar hal anu henteu dipiharep,” ceuk Dadang, basa Press Release, di Kedai Rempah, Desa Balong Kecamatan Sindangagung, Ahad, 28 Januari 2024.
Sajeroning kitu, Kordiv Hukum, Pencegahan, Partisipasi Masyarakat dan Hubungan Masyarakat Panwaslu Kecamatan Cigugur, Nurasid Alit Widodo, nyebutkeun di wilayah Kecamatan Cigugur anu ngawengku 5 desa jeung 5 kelurahan, aya 148 Tempat Pemungutan Suara (TPS). TPS pangreana aya di Kelurahan Cigugur ngahontal 30 TPS. Ari TPS anu pangsaeutikna di Desa Gunungkeling aya 5 TPS.
Nurasid miharep, sangkan pengawas kelurahan desa (PPD), ngutamakeun koordinasi jeung panitia pemunggutan suara PPS desa atawa kelurahan sewang-sewangan pikeun nalingakeun logistik pemilu tea.
“Tujuanna supados dina waktosna logistik pemilu didistribusikeun atanapi dicandak ti PPK, tiasa diamankeun di tempat anu aman di daerahna sewang-sewangan,” ceuk Nurasid.
Eta hal, ditetelakeun oge ku Kordiv Penanganan Pelanggaran dan Penyelesaian Sengketa, Jajang Abdul Rahman, dina ngalakonan koordinasi PPD jeung PPS teh, taya bedana reujeung koordinasi Panwaslu jeung PPK.
Bedana teh Panwaslu jeung PPK mah di wilayah kecamatan, sedengkeun PPD jeung PPS di wilayah desa atawa kelurahan.
