Network
GALURA.CO.ID -Kementerian Pendayagunaan Aparatur Negara dan Reformasi Birokrasi (PANRB) ngarojong instansi pamarentah ngomean birokrasi sangkan sakumna usikna bisa aya pangaruhna keur masarakat. Pikeun hal eta, kudu evaluasi maneuh ka instansi pamarentah.
Ku kituna Pamarentah Kabupaten Majalengka lebah dieu Bagian Organisasi Setda Majalengka satekah polah ngamean pelayanan publik ku cara monitoring tur evaluasi Pelayanan Publik kana Perangkat Daerah sacara maneuh.
Eta teh ditepikeun ku Wakil Bupati Majalengka nalika muka kagiatan Pelayanan Publik Prima di Gedong Yudha Karya Pemda Majalengka, Salasa (16/10/2023). Milu ngaluuhan Sekda Majalengka, sakumna staf ahli, sakumna assiten, sakumna kepala OPD, sakumna Camat katut ondangan.
Baca Juga: Pansus II DPRD Kabupaten Majalengka Kunker ka DPRD Kota Bogor, Ngaguar Raperda Ideologi Pancasila
Wabup nyebutkeun ASN kudu ngaladean masarakat sacara gembleng. "Ajen-ajen dina pelayanaan nu dilaksanakeun ku sakumna ASN kedah dijiwaan sareng ihlas, supados dina pelayanan ngahasilkeun ajen panghadena kangge masarakat," ceuk Wabup.
Di pamarentahan aya tilu pelayanaan: pelayanaan barang nyaeta bantuan pikeun masarakat; pelayanan jasa, di antarana pelayanan umum saperti rumah sakit, jeung puskesmas. Katilu pelayanaan administraip nyaeta pelayanaan Adminduk ti Disdukcapil oge perijinaan ti DPMTS.
Bagian Organisasi Pemkab Majalengka taun 2023 ngaleler pangajen ka dinas, badan, RSUD jeung kecamatan. Juara kahiji Disdukcapil, juara kadua RSUD Cideres, juara katilu DPMTS, juara harapan kahiji Dinsos sarta juara harapan kadua Dinas Arsip dan Perpustakaan.
Kategori Kecamatan, juara kahiji Kecamatan Sindang, juara kadua Kecamatan Sindangwangi, juara katilu Kecamatan Kadipaten, juara harapan kahiji Kecamatan Cigasong sarta harapan kadua Kecamatan Cikijing.*** Ayank R Sambara
