Network
GALURA CO.ID -Dinas Kebudayaan Pemuda dan Olahraga (Disbudpora) Kabupaten Ciamis dina taun 2024 bakal ngusulkeun Hajat Bumi Cariu nu biasa digelar di Desa Sukadana, Kecamatan Sukadana, jadi Warisan Budaya tak Benda (WBTB) tingkat Jawa Barat.
Kitu anu ditepikeun ka Nunik Sugiarni, Kasie Sejarah dan Nilai Budaya Disbudpora Kabupaten Ciamis dina biantarana di acara kasundaan Merlawu, di Desa Ciparigi, Kecamatan Sukadana, Saptu, 23 September 2023.
Najan dina acara kasundaan sarta tempatna di padesaan di Sunda nu masarakatna 100 persen make basa Sunda, Nunik Sugiarni biantarana make basa Indonesia teu diselapan hiji-hiji acan kecap basa Sunda.
Baca Juga: Jalan Kabupaten Gardu - Cisaga Hareupeun Pangumbahan di Cinutug, Desa Selacai, Ciamis, Mindeg Ruksak
Padahal Bupati Ciamis, Herdiat Sunarya, dina acara kasundaan sarta tempatna di Ciamis jeung nu ngaluuhanana lolobana urang Sunda, teu weleh make basa Sunda kalayan puguh entep seureuhna.
Nunik nyebutkeun tradisi jeung budaya di Ciamis geus aya sababahara hiji nu geus diaku WBTB Jawa Barat jeung Nasional. "Dipiharep Hajat Bumi Cariu oge ditetepkeun jadi WBTB Jawa Barat jeung WBTB Nasional," pokna.
Kasang tukang digelarna Merlawu di Desa Ciparigi, ceuk legenda di Desa Parigi, pedah di Desa Ciparigi aya patilasan Dipakusumah, Senopati Galuh, nu ngungsi alatan Bedah Ciancang di Cibatu, Kota Ciamis ayeuna. Harita cenah Mataram ngarurug Karajaan Galuh.
Dina sejarah Ciamis, Bedah Ciancang lain pedah Mataram nyerang Karajaan Galuh. Tapi karaman ti Jawa nu ngabalukarkeun euwah-euwah. Waktu eta, Galuh alatan dijajah ku Mataram, geus jadi kabupaten, lain karajaan.
Baca Juga: Di Kabupaten Ciamis, 192.284 KPM Meunang Bantuan Pangan Tahan II
