GALURA-Melak tutuwuhan di pakarangan Imah, hususna jenis sayuran, sajaba bisa nyumponan kabutuh sapopoé, ogé nyumponan kabutuh pikeun kasaimbangan gizi.
Samalah bisa leuwih aman, ku sabab dipelak ku sorangan, dipiara ku sorangan, jeung kapetik langsung ti pakarangan imah sorangan.
Leuwih ti kitu, lamun pakarangan Imah teh lega bisa melak tutuwuhan ku cara babarengan, ngabentuk kelompok tani.
Baca Juga: Bunga Désa Dadang Supriatna di Sukanagara Direuah-reuah Pagelaran Wayang Golék Bhatara Séna
Di wewengkon Kabupaten Kuningan kiwari aya salah sahiji kelompok wanita tani (KWT) anu keur ngahangkeutkeun melak sayuran di lahan pakarangan.
Nyatana, KWT Lestari Alam, Desa Setianegara, Kecamatan Cilimus, melak rupa-rupa jenis sayuran di lahan pakarangan sacara husus anu legana kurang leuwih 10 bata.
Eta lahan anu dipelakan rupa-rupa jenis sayuran kayaning sosin, pecay, tomat, saledri jeung jenis sayuran sejenna teh, lahan milik Kepala Desa Setianegara nu dimangfaatkeun ku eta kelompok.
"Ieu lahan teh kagungan ibu Kuwu nu dimangfaatkeun ku KWT. Alhamdulillah sababaraha dinten kapengker pelak sayuran teh tos dipanen," Ceuk Ketua KWT Lestari Alam, Riche Wahyu Dety Kurnia, ka Galura, Ahad, (22/1/2022).
Ceuk Riche, ladang sayuran nu dipanen teh dijual, ladangna digolangkeun deui pikeun meuli, gemuk jeung waragad psmiaraan sejenna.
Leuwihna ditabungkeun di Bank Kuningan, kakara meunang Sajuta Rupia.