Network
GALURA.CO.ID. - Réana 138 lukisan karya barudak anu di antarana penyandang disabilitas, dipamerkeun dina “Pameran Seni Rupa Anak dan Difabel” anu mangrupa bagian tina kagiatan Art Braga #2. Pameran anu jejerna “Kota dan Imajinasi” téh lumangsung di Rumah Seni Ropih, Jalan Braga, Kota Bandung, 2-11 Séptémber 2023.
Ketua Art Braga, Rahmat Jabaril, nétélakeun, barudak nu aub dina éta pameran téh lain saukur ti komunitas (sanggar rupa/lukis) wungkul, tapi ogé barudak ti sababaraha sakola.
“Kitu deui karya-karya barudak difabel. Aranjeunna ngarepresentasikeun gagasan artistikna, ku kamahérna dina ngalukis. Ieu dua kelompok téh dihijikeun dina tema anu sami, nyaéta sual impian aranjeunna ngeunaan kota. Nya ku émutan ieu pisan, ieu pameran jejerna ‘Kota dan Imajinasi’,” ceuk Rahmat Jabaril.
Dr. Ika Ismurdiyahwati, M.Sn., kurator “Pameran Seni Rupa Anak dan Difabel” nyebutkeun, dina éta kagiatan seni rupa Art Braga, barudak téh diaubkeun dina kakaryaan hasil penciptaan maranéhna. Maranéhna ngarespon pasualan tempat dumuk jeung tarékahna dina neuleuman pasualan kota.
“Ku kituna, dina kagiatan ‘ArtBraga#2’ taun 2023 ieu, murangkalih téh gaduh kasempetan ngadugikeun aspirasi katut inspirasina dina ngarespon kota anu dicicinganana. Éta téh kanggo ngasah kapekaan ka lingkungan tempat dumuk maranéhna,” ceuk Ika Ismurdiyahwati.
Ika miharep, nalika urang ngarespon karya barudak, urang bisa paham kana naon anu ku maranéhanana diungkabkeun dina karya-karya lukisna. Lebah dieu Ika nyontokeun lukisan anu judulna “Kampung Braga”, karya Ardi (6 taun).
Baca Juga: Mama Nur Terlambat Ajak Pindah Lapak Streaming Shopee Live, Atta Halilintar Kesal
