Network
GALURA -Alatan geus raket pisan, Presden Soekarno kungsi nitip buku koleksina ka Akip Prawirasuganda. Nu matak di padumukan Akip Prawirasuganda loba buku koleksi Presiden munggaran. Waktu Akip Prawirasuganda ngantunkeun (7 April 1961), Presiden Soekarno ngirimkeun jurunganana pikeung mawa koleksi bukuna.
Tangtu wae keur ahli waris Akip Prawirasuganda, dicokotna buku koleksi Presiden Soekarno nu dititipkeun ka Akip Prawirasuganda matak helok. Ahli waris Akip teu apaleun di padumukan Akip di Bojongloa No. 20 Kota Bandung loba buku koleksi Presiden.
Najan kitu ahli waris Akip Prawirtasuganda teu ngahalangan ka anu ditugaskeun ku Presiden Soekarno nyokot buku koleksina nu dititipkeun ka Akip Prawirasuganda. Ngan ahli waris Akip teu apaleun mana buku koleksi Presiden jeung mana buku koleksi Akip Prawirasuganda.
Baca Juga: Citarum Tempatna Nguniangna Peradaban Sunda jeung Ngadegna Karajaan Tarumanagara
Ceuk nu apal, dibawana buku koleksi Presiden Soekarno ti padumukan Akip Prawirasuganda merlukeun sababaraha hiji mobil, nandakeun jumlahna tangtu wae lain ukur ratusan tapi rebuan, pabukon nu kawilang gedé, kaasup keur jaman kiwari.
Teu jéntré naha koléksi buku Presidén Soekarno dibawa ti padumukan Akip Prawirasuganda aya kénéh atawa geus bacacar. Naha ngan buku titipan Presiden Soekarno wungkul nu dirawatan teh atawa aya oge buku karya Akip nu kabawa?
Waktu harita ahli waris teu merhatikeun. Ngan nya tangtu wae dina lalakon nu kaunggel di luhur, bisa ditetelakeun Akip nu sakitu rancagena nulis nalika jumeneng, tapi kiwari boh naskah boh buku ngan aya sabagian leutik. Kamarana karya Akip nu lianna?
Murid-muridna kungsi nyebutkeun mun Akip Prawiranegara keur nulis naskah sok rajeun make mesin tik nu aya di Gedung Yayasan Pusat Kebudayaan (YPK), Jalan Naripan Bandung.
