Network
GALURA -Ka Makam Eyang Mahmud di Kampung Mahmud, Desa Mekarrahayu, Kecamatan Margaasih, Kabupaten Bandung, saban poe tara towong ku nu ngadon ziarah.
Anu ziarah ka Makam Eyang Mahmud di Kampung Mahmud ti saban daerah. Lain wae warga sabudeureun Mahmud tapi teu kurang anu datang ti luar Kabupaten Bandung.
Di antara nu ziarah ka Makam Eyang Mahmud di Kampung Mahmud aya anu ti luar pulo Jawa, ngahaja seja ujlah ngadon mukim aya anu lilana saminggu, aya anu tepi ka opat puluh poe.
Baca Juga: Putri Anjungsari (26), Nulungan Hasan nu Dipergasa ku Prajurit Cirebon, Ngadu Kasakten bari Demit
Tokoh anu dipendem di Makam Eyang Mahmud di Kampung Mahmud teh Syekh Abdul Manaf anu satuluyna meunang pangjuluk Eyang Mahmud.
Ceuk kuncen, nepi ka kiwari tacan aya kasang tukang riwayat anu eces saha jeung urang mana sabenerna Eyang Mahmud teh.
Aya nu nyebatkeun cenah Syekh Abdul Manaf teh rundayan waliyulloh Syarif Hidayatulloh Cirebon, aya oge anu nyebatkeun anjeuna teh teureuh Mataram, putra Pangeran Nagadirdja.
Dumasar kana naskah Sajarah Bandung, dina taun 1628 Sultan Agung Mataram ngirimkeun pasukan anu di pingpin ku Tumenggung Bahureksa pikeun ngarurug kompeni di Batavia (Jakarta).
Baca Juga: Mat Peci, Antara Garut jeung Bandung, Ngageunjleungkeun Nagara
Sultan Agung menta bantuan pangrojong ti pasukan Pasundan pingpinan Dipati Ukur. Dipati Ukur ngeprik pasukan tempur lobana 10 rebu, siap bergabung jeung pasukan Mataram ngarurug kompeni di Batavia.
Sok sanajan anu antukna pasukan Dipati Ukur kasoran ngalawan pasukan kompeni.
Pon kitu keneh pasukan Mataram nu komandanna Tumenggung Bahureksa sarua teu manggapulia nyanghareupan kompeni anu samagrang ku pakarang.
Turug-turug serangan ti pasukan Dipati Ukur jeung pasukan Tumenggung Bahureksa teu guyub. Pasukan Dipati Ukur miheulaan ngayakeun penyerbuan ka Batavia, sok padahal kahayang pasukan Mataram mah penyerbuan teh dilaksanakeun babarengan.
Pangna kitu teh cenah pasukan Dipati Ukur ngarasa kesel meh saminggu nungguan pasukan Mataram anu di pingpin ku Tumenggung Bahureksa can embol-embol datang. Samemehna pasukan Dipati Ukur teh transit heula di Karawang nungguan pasukan Mataram.
Baca Juga: Kangjeng Prebu, Bupati Manten Galuh nu Mampuh Mengkolkeun Jalan Kareta Api
Ku ayana penyerbuan teu guyub tea alhasil kurang kakuatan. Pasukan Dipati Ukur kadeseh, bubar katawuran. Nasib sarupa satuluyna karandapan oge ku pasukan Mataram.
Balatentara Mataram ka ered mundur. Prajurit Mataram bubar paburencay. Aya nu ngidul, aya nu ngetan, lumpat pada-pada nyalametkeun diri.
Sabagian gede langsung muru Mataram nepikeun laporan ka Sultan, netelakeun pasukan Dipati Ukur teu beunang di percaya, hianat miheulaan indit ngayakeun penyerbuan ka Batavia.
Di antara prajurit Mataram anu teu kungsi mulang deui ka Mataram teh Ki Abdul Manaf anu satuluyna meunang pangjuluk Syekh Abdul Manaf alias Eyang Mahmud.
Abdul Manaf jeung sababaraha urang baturna aprak - aprakkan neangan tempat panyumputan anu sakirana aman moal kabeledig ku soldadu kompeni.
Ahirna Abdul Manaf manggihan tempat, sisi walungan Citarum. Taneuh ranca (embel), berecek teu pikabetaheun. Eta tempat teh perenahna buni pisan, kaliung kasiput ku walungan Citarum.
Tepi ka kiwari eta tempat nelah Kampung Mahmud, bareto mah kaasup kampung adat. Abdul Manaf dikurebkeun di Kampung Mahmud.***
