Network
GALURA - Lain sakali-dua kali Galura lolongok ka Patilasan Singaperbangsa nu perenahna di sisieun jalan Siliwangi, Kota Banjar, Jawa Barat teh.
Ngan sabada Galura pindah ti Kota Banjar ka Sumedang taun 2011, lolongok ka patilasan Singaperbangsa teh karek sawatara waktu kaliwat.
Basa pareng ka Pangandaran, Galura ngahaja nyimpang heula ka situs Singaperbangsa, bari sakalian ngareureuhkeun kacape.
Muru ka makamna teu singna hese. Di sisieun jalan katara plang nu nuduhkeun situs, teu jauh ti batu gede.
Lian ti eta, aya jalan satapak nanjak nu geus lidig balas pada nincakan, nu anggangna kira 20 meteran ti sisieun jalan. Leumpang kira lima menit ti jalan ge, situs geus katincak. Dikulibeng pager kai jeung awi, sarta aya dina iuh-iuh tangkal gede.
Aya dua “makam” atawa patilasan di Situs Singaperbangsa nu perenahna di Gunung Babakan, dina lahan bogana PT Perhutani jeung ditangtayungan nagara luyu jeung UU No 5 Taun 1992 Bab VIII Pasal, 2.5 teh.
Nu hiji rada panjang jeung rubak, nu hiji deui rada leutik. Ngan duanana ge sarua, nyangirah ngaler, aya tetenggeran jeung ditutupan batu tatapakan.
Baca Juga: Rumpaka atawa Lirik Lagu 'Runtah' ti Doel Sumbang Nu Viral Nepi ka Kiwari
Nurutkeun katerangan, makam nu gede jeung panjang, makamna Adipati Singaperbangsa, ari nu hiji deu, nu ukuranna rada leutik, geureuhana Singaperbangsa.
Di luareun situs, aya sasaungan dua. Nu hiji, perenahna deukeut pisan makam, ari nu hiji deui, dina tempat nu mirupa guha, nu ditaksir sok dipake sare ku nu ngadon jararah.
Hanjakalna, unggal lolongok ka situs, Galura can diparengkeun tepung jeung juru kunci atawa kuncenna.
Baca Juga: Mabokuy, Momones Anyar Ti Rajadesa, Ciamis, Mucunghul tina Jiwa Seni Warga nu Apal Kana Potensi Desa
Cek warga nu kapergo keur neangan suluh pangpung mah, kuncenna teh jarang aya, imahna ge duka teuing di mana.
“Tara aya, Kang. Unggal abdi kadieu milarian suluh ge, sok suwung wae,” cek Sapri, warga nu harita keur neangan suluh. Najan kitu, Sapri apal yen ngaran kuncenna ayeuna teh, Bastari, kuncen anyar gaganti bapana nu geus tilar dunya sawatara taun ka tukang.
Alatan can kungsi tepung jeung kuncenna tea, saha saenyana nu sumare di makan Gunung Babakan, teu kakobet kalawan jentre.
Baca Juga: Putri Anjungsari (9)
Paling nu dipake cecekelan teh katerangan Sapri jeung sawatara referensi dina buku.****
