Network
GALURA.CO.ID -Ci Tarum walungan pangpanjangna di Jawa Barat, sungapanna di Cisanti Gunungwayang, Kecamatan Kertasari, Kabupaten, Bandung. sékéna, aya tujuh. Ieu walungan ngamalir ngaliwatan, Kabupaten Bandung, Bandung Barat, Cianjur, Purwakarta, Subang, Karawang, Bekasi, Karawang, sarta ngamuara di laut Jawa.
Gedé pisan mangpaatna keur kapentingan tatanén, miara lauk, jeung listrik, Ci Tarum teh. Hanjakal pisan Ci Tarum geus kakeumeuhan ku rupa-rupa kokotor, antukna jadi walungan nu pangkotorna sa alam dunya. Tong boro dipaké kaperluan rumahtangga dalah nyeueungna ogé geus sareukseuk.
Kiwari Citarum keur dibersihan, keur dibebenah, ngarah genah ditempona. Cohagna malar karasa deui mangpaatna ku balaréa. Nu jadi luluguna papamréntah pusat, malah dijejeran langsung ku Présidén, kalawan ngaubkeun TNI jeung POLRI.
Baca Juga: Siberli jeung Korupsi di Jawa Barat, Ceuk KPK, Jawa Barat ti 2004-2021 Provinsi Pangkorupna
Sanajan geus digederkeun ngaliwatan program Citarum harum, hasilna can pati katara. Masih kénéh jauh kana hérang ngagenclang, ieu téh alatan can nguniang rasa miduli ti sakumna masarakat.
Tumuwuhna kasadaran masarakat kacida pentingna, babakuna masarakat nu panganjrekanna aya di sabudeureun walungan. Masarakat kudu diaubkeun miara walungan Citarum.
Ceuk Ketua Citarum Institute, Dr. Eki Baihaki, kiwari geus nguniang rasa miduli miara cai, hudangna rasa miduli perlu diapresiasi. “Miduli ngandung harti daék ngariksa, sabab ngarawat, ngarumat Citaru, teu bisa ngan ukur ku Pamaréntah, meresihan Citarum pancen gawe sakumna masarakat,” pokna.
Dipiharep tokoh masarakat umajak ka masarakat singkil babarengan ngajaga jeung ngariksa Citarum, sangkan isuk jaganing géto Citarum harum karasa, karampa mangpaatna ku sakumna masarakat.
