GALURA -Gebyar Satu Juta Kuota Halal, di 1000 titik sa-Indonesia dina program Sertifikat Halal Gratis (Sehati), salasahijina di KUA Cisarua, Kabupaten Bandung Barat (KBB). Kepala KUA Cisarua, Drs. Asep Saefudin Koswara Salasa (27/06/2023) netelakeun targetna wirausahawan UMKM jeung pangusaha nu geus gede.
Program Sertifikat Halal Gratis (Sehati) dina Gebyar Satu Juta Kuota Halal, ceuk Asep nu harita dijejeran ku Penyuluh Agama Islam KUA Cisarua, Irfan Hamara, S.Ag., nu daftar teu dipulut biaya nanaon. Sehati keur wilayah Kecamatan Cisarua, ceuk Irfan, targetna ngahontal angka 400 pangusaha atawa wirausahawan.
"Alhamdulillah, animo pangusaha kawilang ageung, partisifasi pangusaha daria nu daftar dinten ayeuna tos ngahontal angka 100 langkung, " pokna. Lebah dieu program Sertifikat Halal Gratis (Sehati) dina Gebyar Satu Juta Kuota Halal pada ngabageakan, kaasup di wilayah kerja KUA Cisarua.
Baca Juga: Gelar Fornas VII Bupati Miharep Kabupaten Bandung Jadi Pribumi nu Someah
Ayana kasadaran para pangusaha jeung wirausahawan UMKM nu ngadaptarkeun produkna sangkan mibanda sertikat halal, ceuk Irfan, teu leupas ti bantuan Penyuluh Agama Non PNS (PAH) sa-Kacamatan Cisarua, para tokoh agama di pasantren, rengrengan pangurus DKM, MUI katut rojongan lintas instansi.
Luyu jeung aturan nu kaunggel dina UU No 33 taun 2014, pentingna pangusaha atawa wirausahawan ngadaptarkeun prodak usahana, enggoning nyiptakeun rasa aman jeung kapercayaan ti sakumna konsumen nu mikabutuh jeung ngosumsi sawatara produk. Ngawengku produk dahareun, inuman, jeung produk sejenna.
Sajumlah wirausahawan nu torojogan daftar ka KUA Cisarua, daria ngaptarkeun produkna. Upamana pangusaha Warung Kopi, Iden Andi Gustira, ngadaptarkeun produkna bari mikeun samplena. Basa diasaan produk kopina, kawilang nikmat.
"Proses produksi kopi, kirang langkung saminggu waktuna, ti ngawitan moe buah kopi dugi ka coplok kulitna, dipoe dugi ka garing, dirosting, diedarkeun ka masarakat," pokna.