Network
GALURA –Dina mieling Hari Peduli Sampah Nasional (HPSN), di Taman Bagja Raharja, Salasa (21/02/2023), Bupati Majalengka Dr. H. Karna Sobahi, M.MPd, ngelingan urang kudu engeuh runtah teh teu ngan ukur jadi runtah.
Bupati Majalengka waktu biantara dina mieling HPSN nu digelar ku Dinas Lingkungan Hidup (DLH) Kabupaten Majalengka nyebutkeun runtah bisa diropea jadi barang nu aya mangpaatna. Di antarana runtah organik bisa dijieun kompos, runtah plastik, botol urut cai kemasan bisa dijieun karajinan.
Ceuk Bupati Majalengka, pasualan runtah kiwari lain pasualan enteng. Diperelukeun kadariaan dina ngungkulanana, lain ukur pamarentah tapi oge sakumna masarakat. Ieu nu jadi udagan utama HPSN teh.
Baca Juga: Ekspor Munggaran Kumeli jeung Buncis Kenya, Hasil Tatanèn Patani Pangalengan
Bupati Majalengka nyebutkeun unggul poe runtah tambah ngagunduk di TPA (Tempat Pembuangan Akhir). Kamampuhan TPA di Kabupaten Majalengka kawates ari runtah unggal poe ngaronjat. “Urang sarerea kedah aub dina ngungkulan pasuakan runtah,” pokna.
Kepala DLH (Dinas Lingkungan Hiduo) Kabupaten Majalengka Ir. Hj.Nadisha Hanna dina laporanana nyebutkeun HPSN nu dipieling unggal 21 Februari teh sangkan urang sarerea merhatikeun jeung aub dina ngungkulan pasualan runtah.
Jejer HPSN taun ayeuna 2023: "Tuntas Kelola Sampah untuk Kesejahteraan Masyarakat". Ieu jejer ditujukeun ka sakumna masarakat, lain ukur keur pamarentah.
"Tarekah ngirangan runtah, utamina runtah palastik dilaksanakeun kalayan daria. Ieu salahsawios lengkah dina ngokolakeun runtah palastik nu teras minuhan planet nu namina Bumi," ceuk Kadis Nadisa .
Baca Juga: Ceuk Wabup Kuningan, Basa Sunda Kudu Dipake Dina Kahirupan Sapopoe
Kadis LH nyebutkeun pamarentah dina ngungkulan runtah geus netepkeun strategi dina dina ngokolakeun runtah sangkan jadi bahan nu mibanda ajen. Panarekanana 3R: Reduce, Reuse jeung Recycle.
Strategi Kebijakan Pengelolaan Sampah Daerah (Jakstrada) titincakanana Perbub no. 31 taun 2019 ngeunaan Pengelolaan Limbah Rumah Tangga dan Limbah Liannya kalayan target Indonesia beresih taun 2025.
Patalina jeung HPSN, di Kabupaten Majalengka geus dilaksanakeun kagiatan beberesih lingkungan, lomba video kreatif ngeunaan daur ulang runtah sarta ngamangpaatkeun runtah plastik ku PKK kacamatan sa- Kabupaten Majalengka.
Anu nyangking kajuaraan lomba video kreatif: juara kahiji Bapenda; juara kadua DP3AKB, jeung; juara katilu dicangking ku Diskomimfo.
Lomba tingkat PKK, juara kahiji Tim PKK Kacamatan Ligung; juara kadua Kacamatan Sindang, sarta; juara katilu Kacamatan Malausma.
Dina mieling HPSN taun 2023 Bupati Majalengka sacara simbolis masrahkeun hadiah jeung bantuan ka patugas kebersihan katut penggerak paduli runtah.
Anu ngaluuhan HPSN di tingkat Kabupaten Majalengka, Forkopimda, Ketua Umum Tim pemgerak PKK Kabupaten Majalengka, sakumna kapala OPD, camat sarta ondangan lianna.*** Ayank R Sambara
