Network
GALURA.CO.ID -Polsek Majalengka Kota Polres Majalengka Polda Jabar ngaroris urug nu nutupan Jalan Munjul Ciandeu, Blok Mukti Rahayu, Rt 001 Rw 009, Desa Sidamukti, Kecamatan Majalengka, Kabupaten Majalengka, Senen peuting (19/02/2024). Dilaksanakeun ku Piket Polsek Majalengka Kota bareng Bhabinkamtibmas jeung Kanit Intel Polsek Majalengka Kota.
Ceuk katerangan Kapolres Majalengka, AKBP Indra Novianto, S.I.K., M.Si., CPHR, ditepikeun ku Kapolsek Majalengka Kota, AKP Iwan Sutari, S.IP., M.AP, material tanah urug nu nutupan jalan kurang leuwih aya 3 meter kubik, sabada hujan badag.
"Kronologi kajantenana: dinten Senen kaping 19 Februari 2024 kinten-kinten tabuh 18.06 WIB, nalika hujan ageung di wewengkon Desa Sidamukti, Kecamatan Majalengka, Kabupaten Majalengka. Teras, kajadian tanah uruhg sarta materialna nutupan jalan, kalayan volume kirang langkung 3 meter kubik," ceuk AKP Iwan Sutari.
Akses jalan Sidamukti salila 30 menit teu bisa diliwatan. Ku rempug gawe antara pihak Polsek Majalengka Kota jeung masarakat, dibantu ku Badan Penanggulangan Bencana Daerah (BPBD) jeung Satuan Polisi Pamong Praja (Satpol PP) Kabupaten Majalengka, jalan kiwari geus bisa diliwatan deui.*** Ayank R Sambara
