Network
GALURA.CO.ID. - Sakumna civitas akademika Institut Teknologi Nasional (Itenas) Bandung kudu reueus, lantaran 5 (lima) program studi nu aya di éta paguron luhur kakara meunang akreditasi ti LAM Teknik. Éta program studi nu 5 téh, nyaéta Magister Teknik Mesin (Excellent/Unggul), Teknik Lingkungan (Excellent/Unggul), Teknik Kimia (Very Good), Teknik Elektro (Very Good), jeung Magister Teknik Industri (Alus/Hadé).
Di sagédéngeun éta, dina taun ieu, sababaraha hibah dicangking ku ieu institut nu perenahna di Jalan PKH Mustafa No. 23, Kota Bandung téh. Éta hibah ngawengku Hibah Program Kompetisi Kampus Mandiri (PKKM) Program Studi Teknik Industri, Program Studi Informatika, jeung Hibah Sistem Pendukung Kelembagaan (ISS)-MBKM.
Hibah séjénna dina widang pengembangan atikan jeung pembelajaran ogé aplikasi pangaweruh dina dunya usaha industri (DUDI), nyaéta Hibah Pengembangan dan Pelaksanaan Pembelajaran Digital (P3D) 2023 anu dicangking ku Irma Amelia Dewi, S.Kom., M.T. (Kategori 1), jeung Sofia Umaroh, S.Pd., M.T. (Kategori 2); Hibah Inovasi Pembelajaran Siswa Berkebutuhan Khusus 2023 dicangking ku Rosa Karnita, Ph.D., sarta Hibah Dana Matching "Kedaireka" 2023 dicangking ku Dr. Soni Darmawan, S.T., M.T.
Baca Juga: Pameran Seni Rupa Anak jeung Difabel dina Kagiatan Art Braga #2
“Henteu mung ku Itenas, préstasi akreditasi katut hibah ogé diaprésiasi ku Yayasan Pendidikan Dayang Sumbi,” ceuk Kepala Bagian Humas - Biro Kerja Sama Hubungan Masyarakat, dan Pemasaran (BKHP) Itenas, Dr. Agustina Kusuma Dewi, M.Sos., M.Ds.
Éta aprésiasi ti Yayasan Pendidikan Dayang sumbi téh, cenah, wujudna ku cara méré inséntif jeung Piagam Aprésiasi. Tangtuna, ceuk Agustina, lalakon pangwangunan pribadi jeung kalembagaan sakaligus nguatan Tridharma Perguruan Tinggi Itenas bakal diteruskeun mangrupa wujud kontribusi nyata Itenas minangka Kampus Unggulan Berprestasi.***
