Network
GALURA - Sasalad Covid-19 geus lekasan. Salila 3 taun (2020 – 2022), éta salalad téh ngagunasika urang, tapi perlu diaku sasalad gé geus bisa ngarobah gaya hirup.
“Salasahijina identitas diri, kalebet kahoyong jeung kaperyogianana,” ceuk Deni Yudiawan, nalika jadi narasumber “Socio Eco Journalism”, di hareupeun peserta Journalist Camp PRMN X Eiger 2023 di Sari Ater CamperVan Park, Ciater, Kabupaten Subang, Jawa Barat, 24 Agustus 2023 kaliwat.
Ieu jurnalis senior anu ogé dosen di Fakultas Ilmu Seni dan Sastra (FISS) Universitas Pasundan téh nyontokeun, saméméh ayana sasalad dirina boga kahayang anu béda pisan jeung satutasna sasalad. Kitu deui cenah jeung barudak SD, contona lamun ditanyakeun resep online atawa offline, ayeuna pasti jawabanana resep online lantaran aya perbédaan.
Baca Juga: Khansa Syahla Aliyah: ’Bandera Merah Putih nu Ngelebet di Ponclot Gunung Elbrus, Hiber Kabawa Angin’
Dina ieu kagiatan kolaborasi Pikiran Rakyat Media Network (PRMN) jeung Eiger Adventure anu diiluan ku para jurnalis PRMN aréa Bodebek jeung Jawa Barat téh, Deni Yudiawan ngadadarkeun sual parobahan sabada ayana sasalad Covid-19.
Ieu jurnalis HU Pikiran Rakyat (2002-2016) jeung Koordinator Digital Newsroom di Pikiran Rakyat (2016-2018) téh, ngadadarkeun sual parobahan lianna sabada sasalad anu nujul kana ngaronjatna kapasitas diri. Kiwari jaman sarwa internet, cenah. Internet jadi gampang diaksés. Kiwari réa jalma anu marilu kursus liwat internet lantaran héséna néang pagawéan.
“Iwal ti éta, masarakat halabhab ku informasi ngeunaan budaya lokal. Contona Bali. Sabada ayana sasalad, justru anu aramengan ka ditu téh urang lokal Indonesiana sorangan. Ieu kahartos, lantaran upami ka luar nagri mah teu aya artosna. Tibatan ka nu tebih bari teu aya artosna, mending healing ka nu caket,” ceuk ieu penulis, editor, anu ogé trainer di sawatara instansi jeung perusahaan téh.
Baca Juga: Galih Donikara: ‘Liputan di Alam Bebas kudu Siap Sagala Rupana’
Soal healing, ceuk Deni, data pencarian di Google nuduhkeun yen healing téh kacida ditéangna ku masarakat dina tarékah pencarian identitas diri. “Undak ti taun-taun sateuacanna, dugi ka undakna ge langkung ti 200 persen. Ieu nuduhkeun yén masarakat téh leres-leres hoyong healing," ceuk Deni Yudiawan, Google News Initiative – AJI Indonesia (ti 2018) jeung Digital Entrepreneurship Academy Kementerian Komunikasi dan Informatika (ti 2022).
