Network
GALURA.CO.ID. Ketua Paguyuban Pasundan Kepri (Kepulauan Riau), Dede Suparman, SH., netelakeun, pangurus Paguyuban Pasundan Kepri mindeng nyalametkeun TKI ilegal nu anjog ka Batam kalayan tujuanana rek neangan digawe di Malaysia jeung Singapura.
TKI ilegal nu ditulungan ku Paguyuban Pasundan Kepri teh kadungsang-dungsang di Batam. Taya batur kukumaha. “Aya nu katipu, aya oge nu nekad datang ka Malasyia jeung Singapura,” ceuk Dede.
Anu disalametkeun ku Paguyuban Pusandan Kepri teh kalolobaanna TKI ilegal awewe, saeutik lalaki mah. Waktu disalametkeun, ceuk Dede, TKI ilegal teh kaayaanna matak pikawatireun.
“Aya TKI ilegal di Batam nu gering payah, terus diurus ku simkuring ka rumah sakit, aya oge nu teu katulungan, ngantunkeun,” ceuk Dede nu geus dua entragan jadi ketua Paguyuban Pasundan Kepri.
Keur waragad rumah sakit, lian ti ngodok saku organisasi, Dede ge koordinasi jeung pamarentah Kepri jeung pihak Kementerian Tenaga Kerja. “Warga nu tos sehat dianteurkeun ka lembur asalna,” pokna.
TKI ilegal nu tilar layonna dianteurkeun ka alamat asalna. Umumna, ceuk Dede, TKI ilegal nu rek ka Malayasia atawa ka Singapura asalna ti wewengkon Pantura, Tasikmalaya, Garut, Ciamis, Subang, Sumedang jeung daerah sejenna di Jawa Barat. Aya oge, Jawa Tengah jeung Jawa Timur.
Lian ti nyalametkeun TKI ilegal, Dede ge ngungkulan masarakat Jabar nu kadungsang-dungsang di Batam, lantaran hirupna ngalaligeuh, teu boga pacabakan.
“Maranehna datang ka Batam, ka bongroy ku pangbibita, beja saliwat bumebyarna hirup di Batam. Kabita indit wae ka Batam, tapi eu boga kaahlian,” pokna.
