Network
GALURA. CO.ID - Satuan Reserse Narkoba (Sat Res Narkoba) Polres Majalengka Polda Jabar rukun gawe jeung Desa Kadipaten, Kecamatan Kadipaten, Kabupaten Majalengka nyieun lukisan mural keur ngaedukasi masarakat ngeunaan bahayana narkoba, Ahad (27/8/2023).
Sat Res Narkoba Polres Majalengka jeung Desa Kadipaten nyieun lukisan mural nu informatip jeung kreatip ngeunaan bahaya narkoba di kampung bebas narkoba. Ieu tarekah Sat Res Narkoba dina ngaedukasi masarakat ngeunaan dampak negatip jeung resiko nu diakibatkeun ku narkoba.
Kapolres Majalengka Polda Jabar, AKBP Indra Novianto, S.I.K., M.Si, ditepikeun ku Kasat Narkoba Polres Majalengka, AKP Tatang Sunarya, nyebutkeun udagan ngalukis mural teh nepikeun cumeluk nu penting ngaliwatan media visual nu mibanda daya irut.
Baca Juga: Orientasi Pengurus KNPI Kabupsten Majalengka Taun 2023-2026, Ngali Potensi Pamuda
"Ngadamelan mural teh lengkah inovatip dina ngadugikeun perkawis bahaya narkoba ka masarakat, babakuna generasi ngora. Polres Majalengka hoyong ngaubetkeun warga dina ngalawan narkoba ku cara nu kreatip tur keuna kana sasaran," ceuk AKP Tatang Sunarya.
Latar tukang mural tempat dipoto, ceuk AKP Tatang Sunarya, panggero keur ngajag kamtibmas bisa sumebar leuwih laluasa ku sababaraha platform media sosial. “Ieu lengkah strategis dina ngawangun kasadaran kolektip ngeunaan bahaya narkoba," pokna deui.
Nyieun mural dirojong sagemblengna ku Kapolres Majalengka Polda Jabar, AKBP Indra Novianto. Ieu tarekah lengkah nyata dina nyiptakeun masarakat nu leuwih sadar kana bahaya narkoba tur mibanda peran aktip dina nyengker mahabuna narkoba.
Dipiharep, mural lain ngan saukur ngabewarakeun ngeunaan bahaya narkoba. Tapi oge jadi ikon edukasi pikeun warga nu hayang apal leuwih jero ngeunaan perjoangan ngalawan narkoba.
