GALURA.CO.ID -Wakil Sekretaris Dewan Syuro DPP PKB, KH Maman Imanulhaq jeung sakumna Pengurus DPC PKB Kabupaten Majalengka ngagelar syukuran beubeunangan soara anu dicangking PKB di Majalengka.
Kyai Maman anu oge sukses meunang soara panglobana PKB keur tingkat DPR RI di Dapil Jabar IX katut Ketua DPC PKB Majalengka Dr. H. Juhana Zulfan masrahkeun wakaf tanah ka DPC PKB Majalengka anu kagareupna bakal dibangun Kantor DPC PKB Majalengka.
"Wakaf tanah anu asalna ti simkuring sareng H. Juhana Zulfan buktos syukuran kana cangkingan soanten PKB anu seueur di Majalengka," ceuk Kang Maman, Jumaah (15/03/2024).
Baca Juga: Pemilu 2024, PKB Unggul di Kabupaten Bandung, di DPRD Ayeuna 12 Korsi, tapi ku Naon 01 Eleh?
Kang Maman miharep ku ayana kantor anu anyar jadi motivasi keur sakumna pangurus katut kader PKB di Majalengka.
Anu ngaluuhan acara sakumna pangurus DPC PKB Majalengka: Sekretaris DPC Aan Subarhan, jeung Bendahara DPC Ade Duryawan.
Salian eta oge tembong sajumlah kiyai anu gede pangaruhna di Kabupaten Majalengka nu mibanda peran dina ngumpulkeun cangkingan soara PKB di Majalengka.
Di antarana nu ngaluuhan teh KH Abdur Rosyid, KH Yusuf Karim, KH Harun Bajuri, jeung KH Iso Solah Parwani.
Caleg PKB anu mastikeun cangkingan korsina di DPRD Majalengka: dr Hamdi di dapil 1, Juhana Zulfan di Dapil 2, H Nasir jeung Ade Duryawan di Dapil 3, sarta Tubagus Hishnu Najatin di Dapil 4 katut Imon Hidayat di Dapil 5.
Dina eta kasempetan, Kiyai Maman ngapresiasi kerja pangurus DPC PKB Majalengka anu sukses nganteurkeun kader-kaderna meunang 6 korsi dina tingkat DPRD Majalengka.
Pon kitu deui soara PKB di tingkat provinsi jeung RI oge milu naek dibandingkeun pemilu samemehna. Ngan hanjakalna soara keur capres jeung cawapresna mah henteu sukses, buktina wae di Kabupaten Majalengka soara 01 henteu unggul.
"Wilujeng ka sakumna caleg PKB Majalengka anu kapilih janten anggota DPRD Majalengka. Ieu amanah anu dipasihkeun ku masarakat anu peryogi diperjoangkeun nalika parantos diistrenan janten anggota parlemen," ceuk Kiyai Maman.
Baca Juga: Di Kabupaten Bandung, PKB pikeun saheulanan Unggul
Kiyai Maman nu jeneng anggota Fraksi PKB DPR RI teu poho ngahatur nuhunkeun ka sakumna masarakat Majalengka anu geus milih sakumna wakil rakyat ti PKB di sakumna tingkatan.
Dina Rekapitulasi tingkat KPU Majalengka total soara anu dicangking PKB keur tingkat DPRD Kabupaten 76.596 soara.
Keur tingkat DPRD Provinsi total soara anu dicangking PKB sajumlah 69.378 soara. Di tingkat DPR RI PKB nyangking soara 63.432. Jumlah soara caleg panglobana dicangking ku KH Maman Imanulhaq: 31.538 soara.*** Ayank R Sambara