GALURA – Kodim 0609 Cimahi panen raya jagong nu dipelak dina lahan bogana TNI.
Hasil melak dina lahan lega 19,5 hektar, Kodim 0609 Cimahi panen raya jagong di Kampung Cimalik, Desa Karanganyar, Kacamatan Cililin, Kabupaten Bandung Barat, Rebo 22 Februari 2023.
Kodim 0609 Cimahi ngamangpaatkeun eta lahan ku cara melak jagong tur ayeuna panen raya teh minangka usaha nguatkeun katahanan pangan.
Baca Juga: Kabupaten Sukapura, Kabupaten Bandung jeung Kabupaten Parakanmuncang Hadiah ti Sultan Agung
Dandim 0609 Cimahi Letkol Inf Hary Novana Andriyas, dina eta kasempetan ngahaturkeun nuhun ka sakumna pihak nu geus paheuyeuk-heuyeuk ngarojong kagiatan katahanan pangan Kodim 0609 Cimahi kalawan hasil panen raya jagong mucekil.
"Kuring miharep, ieu usaha Kodim 0609 Cimahi copelna bisa ngabantu masarakat pikeun nyumponan pangabutuh bahan pangan, antarana jagong," pokna.
Laju manehna mertelakeun, rukun gawe antara Kodim 0609 Cimahi jeung Pemkab Kabupaten Bandung Barat, katut parapatani teh, kahareupna sing mingkin paheut dina ngarojong program pamarentah ngawujudkeun katahanan pangan.
Baca Juga: Simbol di Tajug Gede Cilodong Kabupaten Purwakarta
Sajeroning kitu, Kepala Dinas Ketahanan Pangan dan Pertanian Kabupaten Bandung Barat, Lukman Hakim, ngeceskeun, pertanian jeung perkebunan minangka komponen strategis nu ngahasilkeun devisa nu kawilang badag.
Anapon program katahanan pangan teh program nu teu weleh digederkeun ku Presiden RI enggoning nyumponan pangabutuh pangan masarakat Indonesia.
"Kuring ge miharep malar ieu kagiatan panen raya jagong teh masing jadi panyumanget pikeun masarakat dina ngawujudkeun katahanan pangan," pokna.
Baca Juga: Tajug Gede Cilodong Kabupaten Purwakarta, Masigit nu Ngait kana Budaya Sunda
Panen raya jagong Kodim 0609 Cimahi harita dihadiran oge ku Kapolres Cimahi AKBP Aldi Subartono, DPRD Kab. Bandung Barat Rismanto, Kasiter Korem 062 TN Mayor Inf Ahmadi, para Pasi jeung Danramil jajaran Kodim 0609 Cimahi, Pengurus Persit KCK Cab. XX Dim 0609 Cimahi Koorcab Rem 062 TN PD III Siliwangi, Camat Cililin tur Cihampelas, para Kades Kacamatan Cililin, katut Kelompok Tani di Cililin. ***