Network
GALURA.CO.ID. - Sababaraha poé atawa saminggu saméméh tanggal 30 September, sok aya wé stasiun televisi anu muter film “Penumpasan Pengkhianatan G30S PKI” (atawa sok dipondokkeun “Pengkhianatan G30S PKI”). Mémang, tanggal 30 September 1965 téh hiji peristiwa anu moal bisa dipopohokeun ku sakumna bangsa Indonesia. Dina tanggal éta pisan, dina waktu sapeuting, gugurna genep jenderal jeung saurang perwira pertama militer Indonesia bari ngalaman panyiksa nu taya papadana. Layon kabéhanna diasupkeun kana hiji lombang/sumur heubeul nu katelah Lubang Buaya, di wewengkon Jakarta Timur.
Éta peristiwa kulawu téh, ku Presiden Soekarno dingaranan Gestok (Gerakan Satu Oktober), sedengkeun ku Presiden Soeharto disebut Gestapu (Gerakan September Tiga Puluh), sarta waktu Orde Baru, Presiden Soeharto ngarobah sebutanana jadi G30S/PKI (Gerakan 30 September PKI), lantaran di satukangeun éta peristiwa aya penghianatan Partai Komunis Indonesia (PKI) nu aya maksud kudéta kana pamaréntahan nu sah harita (Presiden Soekarno).
Tah, film “Pengkhianatan G30S PKI” téh nyaritakeun éta peristiwa kulawu dina sajarah Indonesia kalawan gemet, tur dina illustrasi musik anu pikasieuneun, pikakeueungeun, tur karasa geueuman .
Ti mimiti dirilis taun 1984, éta film anu durasina 3 jam 40 menit téh kacida fenomenal sakaligus kontroversial. Iwal ti disebut-sebut film paling laris dina mangsana, éta film téh disebut ogé superinfra box-office. Kungsi diwajibkeun ku pamaréntah Orde Baru pikeun ditayangkeun di sakabéh stasiun télévisi unggal 30 September pikeun miéling insiden Gerakan 30 September 1965 téa. Éta palaturan téh tuluyna dihapus taun 1997, najan ahirna pihak stasiun televisi inisiatif sorangan pikeun nayangkeunna unggal tanggal éta.
Baca Juga: Dadang Supriatna: Lain Mieling Hari Kesaktian Pancasila mun Upacarana Teu Tanggal 1 Oktober
Poster film
‘Bis Sekolah’ jeung ‘Genjer-Genjer’
Pikeun anu kungsi lalajo film “Pengkhianatan G-30S PKI” mah, tangtu apal saha anu nyutradaraanana. Enya, taya lian Arifin C. Noer (alm). Sedengkeun panata musikna, Embie C. Noer, adina pituin Arifin C. Noer.
Ku éta filmma, dina Festival Film Indonesia (FFI) 1985, Arifin C. Noer meunang Piala Citra minangka Penulis Skenario Terbaik, atuh Embie C. Noer-na gé asup nominasi Penata Musik Terbaik.
Mun dilenyepan, film “Pengkhianatan G30S PKI” téh karasa pisan pikasieuneunana. Sababaraha adegan, dipapaésan ku panataan musik anu karasana mungguh pikakeueungeun. Leuwih-leuwih ti film horor, ceuk sawatara masarakat nu kungsi lalajo mah.
Kaharti matak kitu gé, da cenah basa éta film rék dijieun, Arifin ngajak ka Embie téh ku basa anu togmol tur singget naker, “Mbi, kita mau bikin film horor.”
