Network
GALURA.CO.ID -DPRD Jabar studi banding ka Yogyakarta pikeun neuleuman PPDB di Yogyakarta nu tara kadenge cecek bocek. Teu kawas di Jabar.
Komisi V Dewan Perwakilan Rakyat Daerah (DPRD) Jawa Barat meredih Dinas Pendidikan (Disdik) Jawa Barat ngaadopsi formulasi Penerimaan Peserta Didik Baru (PPDB) nu dipake ku pamarentah Provinsi Daerah Istimewa Yogyakarta (DIY).
Ceuk anggota Komisi V DPRD Jabar H. Eryani Sulam, M.Si, Dinas Pendidikan Pemuda dan Olahraga DIY dina PPDB ngutamakeun formulasi jalur prestasi jeung zonasi. Siswa nu teu asup zonasi ngaformulasikeun antara katangtuan nasional jeung muatan atawa kaayaan daerahna sewang-sewangan.
“Di Jabar, tepi ka ayeuna aya kana saratusna kacamatan nu tacan mibanda boh SMA Negeri boh SMK Negeri. Tah formulasi ala Pemprov D.I Yogyakarta, ngaubkeun atawa ngalibetkeun lembaga pendidikan swasta. Hal ieu cukup hade dina ngungkulan ganjorna jumlah siswa jeung jumlah sakola,” pokna (21/06/2024)..
Komisi V DPRD Jabar sawatara waktu ka tukang kunjungan kerja (kunker) ka Yogyakarta pikeun nganyahokeun PPDB di Bumi Mataram. Kituna teh lantaran di Yogyakarta PPDB teu kungsi kadenge cecek bocek, taya warta ngeunaan ngangluhna kolot siswa, teu kawas di Jawa Barat nu unggal taun teu weleh aya parobenana
“Tina kituna taya salahna Disdik Jawa Barat nurutan atawa ngaadopsi formulasi ala Disdikpora Yogyakarta. Taya salahna urang ngadopsi PPDB Disdikpora Yogyakarta. Di Jabar masih keneh antara jumlah siswa jeung jumlah sakola, babakuna SMA jeung SMK negeri, ganjor,” ceuk H.Eryani, politisi ti NasDem.
Leuwih jauh ieu anggota DPRD Jabar ti Dapil Jabar XII (Kabupaten Cirebon, Kota Cirebon, Kabupaten Indramayu) nyebutkeun jauh samemeh PPDB, Komisi V geus ngelingan jeung ngajurung Disdik Jabar neangan sosulusi jeung ngarumuskeun formulasi PPDB sangkan dina PPDB di Jabar teu kadenge deui harenghengna.
H.Eryani nyebutkkeun formulasi ala Disdikpora Yogyakarta bisa ngomean sistem PPDB, sarta bisa diterapkeun di Jabar dina nyanghareupan haling harungan di daerah-daerah anu tacan aya sakola negeri. Unggal siswa kudu bisa neruskeun sakola, ulah kateug pedah daerahna teu asup kana zonasi sakola negeri.
Ku ngadopsi formulasi PPDB ala Yogyakarta, Komisi V DPRD Jabar yakineun bisa ngaronjatkeun kualitas Pendidikan di Jabar sarta bisa ngurangan disparitas akses pendidikan antar wilayah. Lian ti eta diharepkeun bisa nyiptakeun kasataraan pendidikan keur sakabeh siswa di Jawa Barat. ***
