Network
GALURA.CO.ID - Dandim 0617/Majalengka Letkol Inf Dudy Pilianto nu diwakilan ku Pasandi Letda Cku Munjir, ngaluuhan acara wisuda angkatan VIII taun pelajaran 2023/2024 Forum Komunikasi Pendidikan Al Quran (FKPQ) tingkat Kabupaten Majalengka.
Wisuda tempatna di Gedong Islamic Center Jalan Siti Armilah Kelurahan Majalengka Kulon, Kecamatan Majalengka, Kabupaten Majalengka, Salasa (02/07/2024).
Anu miluan wisuda angkatan VIII teh Taman kanak kanak Alquran (TKQ), Taman Pendidikan Al Quran (TPQ) jeung Pendidikan Anak Usia Dini Alquran (Paudqu).
Acara diluuhan oge ku Asda 1 Setda Kab Majalengka, Plh Kepala Kemenag Kab Majalengka, Kabaglog Polres Majalengka, Ketua DPD PUI Kabupaten Majalengka, Kasi Ekbang Kecamatan Majalengka, Ketua DWP FKPQ Jabar, Ketua DWPQ Kabupaten Majalengka jeung sakumna kolot siswa.
Plh Kepala Kemenag Kabupaten Majalengka Heru Khoerudin, M.Ag., M.Pd., ngahatur nuhunkeun ka sakumna tamu ondangan nu ngaluuhan wisuda di Gedong Islamic Center.
"Dinten ieu kangge sepuh santri mangrupikeun momentum nu ngandung ajen Sejarah. Dinten ieu dinten wisuda, sakumna siswa bakal neraskeun deui lebet sekolah dasar," pokna.
Letda Cku Munjir nyebutkeun siswa nu diwisuda teh usia emas, leuwih gampang diatik sarta bakal inget terus kana hal-hal nu penting. Minangka kolot, urang kudu mere atikan jeung elmu nu kawilang dasar keur kahirupanna.
"Supados murangkalih urang sakumna kapayunna luyu sareng nu dipiharep, tur nalika dewasa ku janten pribadi nu hade," ceuk Letda Cku Munjir.*** Ayank R Sambara
