Network
GALURA.CO.ID -Dina raraga ngagumebyarkeun milangkalana nu ka-39, SMPN 2 Tanjungkerta, Kabupaten Sumedang ngagelar turnamen bola voly antar SD MI sakacamatan Tanjungkerta jeung Kacamatan Tanjungmedar. Turnamen salila dua poe, Rebo-Kemis, 19-20 Juni 2024, di lapang SMPN 2 Tanjungkerta kalayan diiluan ku 11 kleub putra jeung 4 kleub putri.
Ketua panitia dina ieu kagiatan Eki Suhanderi S,Pd netelakeun diayakeunana turnamen bola voly teh sajabi seja syukuran wireh SMPN 2 Tanjungkerta umurna geus 39 taun, oge seja ngaraketkeun silaturahmi mimitran antara warga SMPN 2 Tanjungkerta jeung guru katut siswa SD jeung MI di Kecamatan Tanjungkerta jeung Kecamatan Tanjungmedar.
“Dipiharep siswa SD sareng MI bakal wawuh tur wanoh kana kaayaan SMPN2 Tangjungkerta, saterasna sing jadi tujuan pikeun neraskeun atikan di ieu sakola “ ceuk Eki. Lulusan SD jeung MI nu aya di eta dua kacamatan dipiharep neruskeun sakolana ka SMPN 2 Tangjungkerta tepi ka teu kakurangan siswa.
Acara dibuka ku Plt Kepala Sakola Iwan Wahyu Priana,S,Pd anu sacara simbolis masrahkeun bola voly ka wasit tangara dimimitiana ieu kagiatan. Harita poe Rebo para pamilon putri anu diheulakeun, poe harita keneh nangtukeun juara. Puncakna dina pertandingan pinal putri antara SDN Kadujajar 3 jeung SDN Cibodas 1, nu jadi juarana SDN Kadujajar 3.
Poe Kemisna pertandingan keur kleub putra. Kaitung lila da loba pesertana ti mimiti babak penyisihan nepi pinal pikeun nangtukeun juara. Pinal putra anu adu hareupan pikeun nangtukeun juara turnamen antara kleub SDN Pasirhuni 1 jeung SDN Boros. Anu kabiruyungan jadi juarana SDN Pasir huni 1.
Hasil tina ieu turnamen: Putra, Juara ka-1 SDN Pasirhuni 1; Juara ka-2 SDN Boros. Putri,Juara ka-1 SDN Kadujajar 3, Juara ka-2 SDN Cibodas 1. Pemain terbaik putra Ramdani Saputra ti SDN Pasirhuni 1 jeung Pemain terbaik Putri: Tiara Mustika Dewi ti SDN Kadujajar 3.
Keur para juara sajaba ti piala kajuaraan anu katarima oge bakal meunang uang pembinaaan anu bakal dipasrahkeun dina waktu perpisahan kelas 9 poe Rebo 26/06/2024 di SMPN 2 Tanjungkerta. Dipasrahkeunanna langsung ku Plt Kepala SMPN 2 Tanjungkertam Iwan Wahyu Priana .S,Pd.*** Yaya Kuswaya
