Network
Karek sataun ngajabat kepala SMPN 16 Kota Tasikmalaya, tapi Titin Suryani, S.Pd mampu mawa parobahan ka nu leuwih hade. Di antarana dina soal kabersihan jeung lingkungan sakola.
GALURA.CO.ID -“Nembé gé sataun ngalih ka dieu téh, nanging beurat awak nambihan,” ceuk Titin Suryani, S.Pd., Kepala SMP Negeri 16 Tasikmalaya bari imut. Ngobrol kituna téh basa PATREM Paguyuban Sastrawati Sunda nganjang ka éta sakola dina raraga Patrem Saba Sakola sawatara bulan katukang.
“Atuda badé teu betah kumaha, di dieu mah palataran sakola téh lega pisan, di pengkerna aya kebon. Sateuacan mayunan padamelan téh, ngurilingan heula kebon, nyeuseup hawa seger bari ningalan héjona tutuwuhan, nyandak seger kana manah. Kantenan kana émutan ogé janten méncrang,” pokna deui bangun reueus.
Ieu sakola nu ngadeg taun 1986 téh lega lahanna 16.190 meter pasagi, ari lega wangunana 1.795 meter pasagi, pernahna di Jalan Cijolang Sukarindik, Bungursari, Kota Tasikmalaya.
Baca Juga: Mapella Unla dina Mapeling Mahasiswa Anyar, Nyalametkeun nu Kapahung di Lante 6
Numutkeun Titin Suryani, S.Pd, kepala sakola nu aktip di organisasi profesi jeung kamasyarakatan téh aya sababaraha program unggulan nu jadi udagan sakola nu dipingpinna, di antarana nyiptakeun lingkungan nu resik, nyaéta “zéro sampah plastik.”
Carana, saban ganti jam pelajaran barudak kudu miceunan runtah pelastik kana tempatna, boh nu aya di jero kelas, boh di luareun kelas, waktuna cukup lima menit. Ku kitu téh lingkungan sakola salilana beresih. Lian ti éta, sok ngayakeun lomba kabersihan antar kelas.
“Apanan upami kaayaan lingkungan pikabetaheun mah, kanggo guru-guru miwah staf didaramelna langkung soson-soson , nu dialajar gé lugina,” ieu carponis nu resep olah raga, ngadongéng, maca sajak, jeung nulis fiksimini téh nyaritana teu weléh dibarung ku imut.
