Network
GALURA. Rektor Universitas Pasundan (Unpas), Prof.Dr. Ir. H. Eddy Jusuf Sp., M.Si., M.Kom., IPU nyebutkeun 15 program studi di Unpas nu geus ngahontal akreditasi A. Dosen-dosenna, 198 dosen nyangking gelar doktor, 411 urang magister, jeung mibanda 27 urang Guru Besar.
“Ayeuna 9 urang nu kiwari nuju proses janten Guru Besar,” ceuk Prof Eddy Jusuf. “Guru Besar teh aset kampus nu patalina jeung Sumber Daya Manusia (SDM). Tina jihad karir ayeuna, 11 urang dosen nu naek jadi Lektor Kepala.
Prof Eddy Jusuf nyebutkeun Unpas kiwari nempatan posisi 10 besar Perguruan Tinggi Terbaik sa-Indonesia, versi Kemristek Dikti.
Unpas oge nempatan posisi ka-5 PTS Terbaik versi 4ICU/Universitas, jeung peringkat ka-33 International Colleges and Universities jeung peringkat ka 4.490 PTS terbaik sadunya versi Webomerries.
Baca Juga: Raden Dewi Sartika Hayang Ngadegkeun Sakola Mimitina Teu Diidinan Bupati Bandung
Kaayaan Unpas nu pikareueseun teh hasil tina perjoangan Prof Eddy Jusuf, pembatu rektor, sakumna dosen jeung sakumna karyawan. Lengkah-lengkahna dina ngamajukeun Unpas dirojong jeung dideudeul ku PB Paguyuban Pansundan jeung ku Yayasan Perguruan Tinggi Pasunda.
Gumelar di Katapang, Kabupaten Bandung, 10 April 1954, Prof Eddy Jusuf ti bubudak hirupna tara leupas ti lingkungan masjid nu tempatna teu jauh ti walungan Citarum, nu mangsa harita mah Citarum teh caina ngagulidag herang ngagenyas.
“Ti bubudak, Akang aktif jadi rumaja masjid, nyambung tepi ka jadi mahasiswa,” ceuk Prof. Eddy Jusup, Guru Besar Teknik Industri LL Dikti 4, Dpk Teknik Industri Fakultas Teknik Unpas nu geus tilu kali noron jadi Rektor Unpas
Keur Prof. Eddy Jusup, masjid teh lingkungan nu matak nengtremkeun hate, tempat neuleuman elmu agama, neuleuman kitab suci Alquran jeung sarupaning kitab sejenna, tempat pamiangan ngasakkeun diri dina ngagayuh kahirupan.
Sok komo, mun waktu geus anjog ka Bulan Suci Ramadhan, kagiatan neuleuman elmuning agama Islam mingkin dihangkeutkeun.
Baca Juga: SMK Pasundan 3 Kota Cimahi Rukun gawe jeung Kolej Vokasional Malayasia
“Mangsa lawas, ku pun aki, alm H. Tobi sareng pun paman, nincak Bulan Ramadhan, neuleuman atikan agama dipupujuhkeun pisan, sabulan puasa kudu khatam Qur’an,” ceuk ieu alumni SDN Sekepeuris I-II, SMPN 8 Margahayu (kiwari SMPN I) jeung SMAN 9 Margahayu teh.
Tina atikan nu jadi kolotna ieu Sarjana Teknik Industri Unpas, lulus taun 1979 jeung Program Akta V, Depdikbud RI, lulus taun 1982 teh, disiplin kana ibadah, shalat jeung ngaji, jadi kabiasaan nu napel pegeuh tepika kiwari.
Selang-selang tina kasibukanana mingpin Unpas, ieu Dosen Penguji Program Doktor di Unpad jeung Dosen Penguji di UPI teh, rengse shalat sok tuluy ngaderes Al-Qur’an.
Prof. Eddy Jusuf ngarengsekeun Program S2 Unpad, widang elmu Ekonomi & Akutansi, lulus taun 1993 jeung ngarengsekeun Program S2 Magister Komputer, STMIK LIKMI, lulus taun 2011, katut Program S3 Unpad, Kajian Ilmu Ekonomi, Pemasaran dan Manajemen Teknologi, lulus Cumlaude, lulus taun 1999.
Baca Juga: Kampung Ramadhan Gada Membaca, Bunda Literasi Kabupaten Ciamis: Ngabiasakeun Maca Penting pisan
Salila ancrub dina dunya akademis, Prof. Eddy Jusuf ngantongan sawatara sertifikat, di antarana, Project Management (Master Project Manager/MPM) ti Amerika, Academy of Project Management (AAPM), USA, taun 2016.
Anu sejenna, Sertifikat Accredited Financial Analyst (AFA) ti Akademy of Finance and Management (GAFM), USA, taun 2016, Certified Digital Marketing Profesional (CDMP) taun 2019.
Lian ti eta, sertifikat Lulusan IPU (Insinyur Profesional Utama) ti Badan Kejuruan Teknik Industri, Persatuan Insinyur Indonesia (PII) taun 2020.
Kailhaman ku Eusi al-Qur-an
Kaselir jadi pingpinan Unpas, saniskara kawijakanana, diaku ku Prof.Eddy Jusuf, kailhaman tina eusining al-Qur’an.
Nyabit kana paneka zaman nu meredih kamampuhan ngungkulan tantangan era globalisasi, ceuk Prof. Eddy Jusuf, taya lian jawabanna lintang ti mekelan SDM mahasiswa Unpas ku saniskara kamampuh, saniskara kaparigelan, sangkan mahasiswa jadi insan nu leubeut ku inovatif jeung hirup mandiri.
Baca Juga: Revitalisasi Harti Peribahasa Sunda, jeung Conto Ngagunakeunana dina Kalimat
“Koncina aya dina literasi pendidikan, adu manis jeung literasi bigdata, literasi teknologi nu disurahan ku literasi nu humanis, bekel diri jadi mahasiswa nu binekas, produktif jeung kompetitif,” ceuk Prof. Eddy Jusuf.
Taya reureuhna ngamekarkeun kahirupan kampus sangkan prestasi widang akademikna bisa leuwih cumarita di tingkat nasional jeung internasional, salasahiji lengkah Prof. Eddy Jusuf, ngayakeun rukun gawe jeung 47 paguron luhur nu aya di 36 nagara.
“Rukun gawe jeung paguron luhur di tingkat internasional, mangfaatna loba pisan, demi ngaronjatkeun ajen akademik mahasiswa Unpas bisa milu kuliah program internasional,” pokna.
Sajaba ti eta, pikeun numuwuhkeun jaringan (networking), malar ngahasilkeun program kamekaran akademik, atuh di tataran dosen. Teu saeutik kiwari jumlah dosen Unpas nu ngajar di paguron luhur di sawatara nagara, panalungtikan ilmiah jeung rancage gawe nu sejenna.
Hasilna, Unpas saban taun narima jumlah mahasiswa anyar jumlahna 4000 tepi ka 5000 urang, malah aya mahasiswa nu asalna ti Turki, Malasyia, Spanyol, Jepang, Australia, Jerman, China, Taiwan, Korea Selatan, Kanada, Timor Leste, Uzbekistan jeung sajumlah nagara sejenna.*** Cecep Ks.
