GALURA –Ngaran Opo Musthofa atawa Mama Opo, hamo bireuk. Inyana teh ulama nu ngadegkeun Pasantren Kandang Sapi, Cianjur, taun 1897, dina taneuh wakaf ti istrina. Matakna, tepi ka kiwari, masarakat mah nyebutna teh Mama Kandang Sapi.
Ngaran Kandang Sapi lain hartina di eta wewengkon aya kandang sapi. K.H. Munandar, incuna Mama Opo atawa Mama Kandang Sapi nu kiwari jadi pupuhu di eta pasantren, nyebutkeun ngaran Kandang Sapi nu aya di wilayah Cianjur teh nyokot tina kecap basa Sunda jeung basa Arab.
Kandang, dina basa Sunda mah, hartina tempat. Kecap sapi tina basa Arab: As-Syafi, hartina nu nyageurkeun kasakit. Mama Opo nu sanggeus ngadegkeun pasantren di Kandang Sapi Cianjur katelah ku sebutan Mama Kandang Sapi, mangsa jumenengna, sok ngubaran kasakit. Mama Opo kaseundeuhan nu hayang cageur tina kasakit boh lahir boh batin.
Baca Juga: Haji Prawatasari (2) Aria Sacanata, Ngurud Kumis Sultan Mataram Sabeulah
Baca Juga: Haji Prawatasari (1) Cenah mah Rundayan Panjalu Ciamis
Baca Juga: Karajaan Galuh jeung Karajaan Sunda, Urang Cai jeung Urang Gunung
Ceuk Aang, nenehna K. H. Munandar, Mama Kandang Sapi, lahir di Kampung Cioray Tengah, kiwari kaereh Desa Nanjungjaya, Kecamatan Kersamanah, Kabupaten Garut, taun 1848 Masehi atawa 1265 H. Wewengkon Kecamatan Kersamanah kaceluk tempat gumelarna para ulama jumhur.
Ramana teh KH. Arkan bin Syeikh Jamhari Cikondang bin Syekh Abdul Jabar bin Syekh Jafar Sidik. Ibuna Mama Kandang Sapi: Rd Wainten, teureuh menak Limbangan, makamna di Bandrek.
“Mung pun aki mah alim disebat turunan menak, gelar radenna disumputkeun, dugi ka ngantunkeunana,” ceuk Aang. Rundayan saterusna henteu marake gelar raden dina ngaranna jeung tara nyaritakan turunan menak.
Mangsa keur budakna, Mama Kandang Sapi nu oge katelah ku sebutan Mama Opo masantren di Tajug Cikendal di Kampung Cioray Tengah. Kungsi nikah jeung Nyai, siwina KH Ahmad Syarif, nu muka pasantren di Cikendal.
Ti Cikendal, Mama Opo nuluykeun masantren, di antarana, di Cilame, Cirangkong jeung Benda, Gadung. Ti dinya, neruskeun nyuprih elmu di pasantren Tegal Gubug, Bale Rante, Madiun jeung Bangkalan Madura. “Anu kantos sasarengan masantren di Bale Rante teh di antawisna Bung Karno. Ari masantrenna mah payun Bung Karno,” ceuk Aang.
Mangsa masantren, Mama Opo, kawilang santri nu temen wekel. Prihatin pisan. Basa keur masantren di Mama Kholil, Bangkalan, Madura, sarungna ukur hiji. Mun geus kotor diseuseuh dina kulah masjid.
“Nungguan sarung garing, ti isuk jedur tepi ka beurang, pun aki sok ngeueum dina kulah,” ceuk Aang.
Mama Opo oge salila jumenengna, yuswana tepi ka-93 taun, teu weleh ngalakonan puasa sunah, puasa Senen jeung Kemis, jeung puasa sunah sejenna, saperti puasa tujuh poe sabada lebaran.
Karomah
Angkatna ka Madura, ceuk Aang, akina teu dibekelan nanaon pisan ku nu jadi sepuhna. “Ihlas we, lumampah, basmallah, seja nyiar luang elmu agama,” pokna.
Ti bubudak, Mama Opo geus ngalakonan puasa sunnah nu tepi ka manjing umur dewasa, geus jadi ulama jumhur, tara leupas tina puasa sunnah.
Tina temen wekelna nyiar elmu dibarengan ku pribadina nu teu weleh ihlas sarta handap asor ka sasama, boh ka budak, ka rumaja, boh ka nu geus dewasa sumawonna ka nu saluhureun, Mama Opo kasinugrahan sawatara karomah nu hamo bisa kataekan ku jalma biasa mah.
Salila jumeneng, Mama Opo can pernah batal wudhu, iwal ti poe tasyrik batalna teh.
Sakaol carita, ceuk Aang, aya semah nu datang ka pasantrenna. Sanggeus nembrakeun pamaksudan, eta semah teh dibere cai anu dido’aan ukur bismillah.
Eta cai teh kudu diinum jeung sawareh dipake mandi. Eta semah ham-ham, pamikirna keur nanahaon rek uubar oge ari ngan saukur dibere cai nu didoaan ku bismillah wungkul
Di satengahing jalan cai pamere Mama Opo diawurkeun kana batu. Ajaib, batuna ancur. Semah kacida kageteunana, tuluy balik deui ka pasantren, menta dihampura ka Mama Opo, bari ngurihit menta cai deui.
Ku Mama Opo dibere deui bari sasanggeum: ”Do’a mah teu kudu panjang-panjang, cukup bismillah we, nu penting urang dienul yakin ka Mantenna nu Ngersakeun.”
Karomah sejenna, hiji mangsa Mama Opo dibarengan ku putrana KH Hidayat, mulang ti pangajian. Harita hujan badag tepi ka caah dendeng. Mama Opo ukur nepakkan cai ku pananganna, eta cai teh nyinglar, mere jalan keur Mama Opo nu rek mulang ka pasantren.
“Seueur karomah pun aki teh, nu hese diudag ku nalar mah,” ceuk Aang.*** Cecep KS