Tarzan Bengkulu ti Ciparay Kabupaten Bandung di Leuweung Dibaturan Welasan Anjing

GALURA.CO.ID –Murni ieu mah Tarzan sakumaha nu geus jadi kacindekkan uteuk urang tina carita wangwangan urang Barat. Ngan lain dongeng fiksi, tapi carita nyata: nonoman Ciparay nu hirup di leuweung Bengkulu.

Ngaranna teh Udang atawa Dadang, umurna 48 taun. Pituin urang Ciparay, Kabupaten Bandung, ti  Calengka. Inyna geus ampir lima taun hirup nyorangan di tengah leuweung gerotan di Bengkulu, Pulo Sumatra. Bisa kasebut nunggul pinang teh lain bobohongan, nunggelis jeung tempat dumukna jauh ka ditu ka dieu.

Waktu Galura unggah ka kolotna di Calengka Ciparay, sarta nanyakeun ngeunaan Dadang, pokna teh: Si Sardang mah geus ting­trim hirup mandiri di leuweung Bangkulu, cenah. Abah Usul, 80 taun, bapana Dadang geus masrahkeun hirup-huripna Dadang ka Nu Mahakawasa, teu sirikna top badak top maung.

Baca Juga: Beubeunangan Ngaronjat Bupati Bandung Ngapresiasi Kinerja Baznas Kabupaten Bandung

Puluhan taun ka tukang, Da­dang teh kungsi jadi kenek treuk, bari ngarereb di dua tempat; Calengka jeung Sapan Tegalluar. Di daerah Sapan cicingna sasat lain di deungeun tapi di nu jadi nini pituinna, jeung  di uwa-bibina anu sabagian gede ruruntuk transmigran nu diiangkeun ku pamarentahan taun 1982. 

Di antara kulawarga uwana, aya anu tagen bumen-bumen di Bengkulu malah pangbeuntana tepi ka mampuh ngalaksanakeun indah haji. Ngaranna teh Abah Ejen, ayeuna mah geus almarhum. Tina jejemna makayakeun lahan jatah pamarentah tepi ka bisa meulian lahan sabudeureunana.

Atuh tina sahektar, lahan jatah ti pamarentah tea, jadi ngabeukahan welasan hektar.  Sabagean gede lahanna dipelakkan kalapa sawit. Bati tina ngebon kalapa sawit tangtu wae matak nguntungkeun. Minyak kalapa sawit jadi bahan baku utama keur minyak goreng. Malah minyak sawit loba diekpor ka nagri deungeun.

Abeh Ejen suwargi oge mampuh nguliahkeun hiji ti antara barudakna di Kota Bandung tepi ka ngahontal S1. Kiwari pakaya titinggal Abah Ejen diurus jeung dikokolakeun ku seuweu-siwi Abah Ejen, kari neruskeun, teu kudu ngabaladah ti enol heula, teu kawas nu jadina bapana waktu taun 1982 transmigrasi.

Baca Juga: Museum Transportasi di TMII Jakarta, Pangjugjugan Wisatawan

Tah, ketak jejem jeung teu cecehanana Abah Ejen teh diguruan ku Dadang. Keur saheulaanan sataun dua taun mah milu nyiruruk di nu jadi uwa manehanana. Mimitina bunta-bantu gawe, di huma, di leuweung, diajar cara melak, miara tug tepi ka panen kalapa sawit. Dadang ahirna parigel dina kalapa sawit.

Abah Ejen nu imahna di area KJS Muko-Muko Bengkulu oge teu ngantep Dadang kitu wae. Suanna nu balantrak jauh-jauh ti Tatar Bandung teh dimodalan sarua jeung ka barudakna anu can maracakal. Dadang atawa katelah di lembur mah Udang ahirna bisa meuli deui lahan sahektar,  anu anggangna ti KJS Muko-Muko teh 8 jam lalampahan make motor

Lain ukur nguyek dina sawit, Dadang oge macakal kana usaha sejenna, samodel ngaborong nu­ar­an tatangkalan kahot sakaligus jeung ngiangkeunana ka bandar. Lian ti eta ngabandar lalab-lumbrah katut ka bungbuahan. Tina usahana kabeuli deui lahan sahektar leuwih. Lahanna kawilang jolok, gigireun lahan nu munggaran dipimlik.

Sanggeus bofa lahan dua hektar,  Dadang nyieun imah weweg di tengah lahan dua hektar bogana. Tuluy bebeja sakaligus amitan ka Abah Ejen deuk nunggal macakal di tengah leuweung Kacamatan Rejang. Diidinan, malah disumengaten, sangkan bisa mandiri jeung boga pangasilan sorangan, jeung dijurung sina leuwih maju.

Baca Juga: Resto Kampoeng Banyumili, Kampung Rasa Sunda di Tanah Jawa

Waktu salasaurang kapi adina Yadi, 45 taun ti daerah Sapan Tegalluar nyukcruk Dadang, ngahaja miang ka Bengkulu, nya ti dieu kapanggihna itungan 8 jam kana motor ti Muko-Muko. Lalampahan sakitu lilana teh lain ngahanca jalan hotmix,  tapi mindeng nungtun motor ari sakalieun mapay jalan rembet areuy jeung kakayon.

Yadi, ngendong dua poe dua peuting di imah Udang anu hirup nunggelis di tengah leuweun, teu anak teu pamajikan da sidik can rarabi. Ari ditanyakeun mah, naha teu niat boga anak pamajikan. Jawabna teh; dua tilu taun deui mah arek, komo lamun geus sukses kasebut bandar sawit atawa juragan leuweung.

Asa hirup dina lalakon Si Tar­zan nu campur gaul jeung gorombolan gorila, keur saterusna jadi jeger leuweung, kitu ceuk Yadi. Kumaha keueung di ditu? Di tengah leuweung sawit? Tacan aya listrik. Euweuh tatangga hiji-hiji acan. Mun aya nanaon teh moal bisa neangan batur kumaha, ujur rajegna tatangkalan jeung rabengna sasaton.

“Betah pisan,” ceuk Yadi kacida betahna. Sok sanajan euweuh lampu listrik. Teu rek kitu kumaha, imahna dijieun tina papan kahot anu tohaga dikuriling tatangkalan dina ampar ngeblagna buruan. Tangkal buah naon oge aya teu sirikna kari ngaronjang. Cai empang ngagenclang tutugan tina tilu umpak curug jangkung.

Baca Juga: Bumi Perkemahan Andes jeung Kalang Pamidangan, Ikon Desa Cilame, Kecamatan Kutawaringin, Kabupaten Bandung

Ari batur hirupna nu matuh mah: anjing, jumlahna wesalan, nu siaga saban waktu jeung saban diperlukeun. "Mun teu dibaturan ku para guik mah, uing moal bisa mastikeun aman teu amanna kaayaan, Bro." Kitu ceuk Udang, nu sapopoena idek liher dina kebon kalapa sawit atawa ngador buburuh nuar oge ngiangkeun kai-kaina ka Bengkulu.

Masalah bahan poko mah, geus biasa nyetok sabulan dua bulaneun utamana beas jeung uyah. Meuli beas jeung uyah mun Dadang ka kota. Da ari deungeun sangu mah lain bohong, ceuk babasan mah nyoer oge aya, kari nyiuk puguh, nyakitu dunya lalab mah narolol tina sela-sela papan bilik imah.

Lahan ngampar boga sorangan teh, ku Udang dipelakan pala, sawit, jambu batu, jengkol, peuteuy jeung nu sejen-sejenna, kabeh oge hasilna dijual. Leuweung nu ceuk dina sawangan mah kacida sepi jemplingna, singhoreng sabalikna, ceuk Yadi.  Ti isuk tepi ka isuk deui teh haneuteun.

Reup peuting, sasatoan disarada patembalan: jengerna bangsa manuk, bangsa surili, bangsa bangkong, bangsa geremet samodek, gaang, kasir, bewok, cihcir, caricangkas, kasintu jeung cangehgar saheng. Disambung isuk-isuk recetna manuk disarada ngabageakeun panonpoe jeung sora sasatoan sejenna.

Keur Yadi mah tepi ka teu kaur ngerejep tapi keur nu ngaran Tarzan ti Sebrang Bengkulu alias Kang Dadang ti Ciparay, soara-soara saheng kitu teh teu beda ti tembang-tembang pamepende. Matak leuwih nibrakeun sare, bisa ngareureuhkeun kacape tas digawe, tas ngurus kebonna, sangkan hasilna mucekil.

Geleger kerekna, milu aub seah marengan seahna para pangeusina jagad alas simagonggong Leuweung Rejang. Dialokan korolakna tilu umpak curug leutik jeung kocepatna burudulan lauk di empang pipireun imah. Matak teu aneh, Dadang  betaheun di leuweung teh, teu ngarasa cuang-cieung.*** Emha