GALURA. CO.ID. – “Selamat pétang Bapak/Ibu semuanya. Barusan saya menerima kabar yang sangat membahagiakan kita semua. Bahasa Indonesia resmi diadopsi secara bulat untuk menjadi bahasa resmi Sidang Umum Unesco. Alhamdulillah. Terima kasih atas dukungan dan doa dari semuanya.”
Kitu béwara nu kaunggel dina Grup WhatsApp Forum Bahasa Media Massa (GWA FBMM) Jawa Barat nu jolna ti Drs. Imam Jahrudin Priyanto, M.Hum, Senén, 20 November 2023, tabuh 21.20. Éta kekecapan téh, ceuk Imam, ditepikeun ku Kepala Badan Pengembangan dan Pembinaan Bahasa Prof. E. Aminudin Aziz, M.A., Ph.D., anu minggu ka tukang pidato di Paris, markas UNESCO, dina GWA FBMM nu séjénna deui.
Luyu jeung anu dibéwarakeun ku Aminudin Aziz, Presiden Jokowi gé dina Instagram @jokowi nyebutkeun, “Sidang Umum ke-42 UNESCO di Paris yang berlangsung Senin 20 November pagi, telah menetapkan secara aklamasi pengakuan atas Bahasa Indonesia sebagai bahasa resmi yang dapat digunakan dalam Sidang Umum lembaga tersebut.”
Ceuk Presiden kénéh dina instagramna, éta badan husus PBB widang pendidikan, kaélmuan, jeung kabudayaan téh netepkeun Bahasa Indonesia liwat resolusi nu judulna "Recognition of Bahasa Indonesia as An Official Language of the General Conference of UNESCO".
Baca Juga: Pemilu Damai 2024, Ketua PWI Jawa Barat Umajak ka Wartawan pikeun Nyegah Hoaks
“Dengan penetapan ini, Bahasa Indonesia dapat dipakai sebagai bahasa sidang, dan dokumen-dokumen Sidang Umum UNESCO juga dapat diterjemahkan ke Bahasa Indonesia,” kitu ceuk Jokowi satuluyna.
Duta Besar RI pikeun Prancis, Andorra, Monako, Mohamad Oemar, dina kateranganna di Jakarta ngécéskeun yén éta penetapan téh ngajadikeun Bahasa Indonesia minangka basa resmi ka-10 anu diaku ku Konferensi Umum UNESCO, di sagigireun Inggris, Arab, Mandarin, Prancis, Spanyol, Rusia, Hindi, Italia, jeung Portugis.
“Bahasa Indonesia geus jadi kakuatan anu ngahijikeun bangsa ti jaman pra-kamerdekaan, utamana liwat Sumpah Pemuda dina taun 1928, tepi ka bisa ngahubungkeun ragemna etnis di Indonesia,” ceuk Oemar sakumaha nu dicutat ku LKBN Antara.
Éta penetapan téh ditandaan ku diadopsina Resolusi 42 C/28 sacara konsensus dina sidang paripurna Konferensi Umum ka-42 UNESCO.
Oemar nétélakeun, yén basa Indonesia anu jumlahna leuwih ti 275 juta panyatur téh geus “ngadunya” ku asupna kurikulum Bahasa Indonesia di 52 nagara, sarta kiwari, sakurang-kurangna aya 150.000 panyatur basa asing anu aktif nyarita dina Bahasa Indonesia.
"Kapamingpinan aktif Indonesia di tingkat global geus dikawitan dina Konferensi Asia Afrika di Bandung taun 1955, anu jadi bibit ngabentukna kelompok nagara non-blok. Indonesia mibanda komitmen nu kuat pikeun nuluykeun kapamingpinan jeung kontribusi positif keur dunya internasional," pokna.
Baca Juga: PGRI jeung Disdik Majalengka Ngagelar Seminar Transformasi Kurikulum Merdeka
Kontribusi éta, cenah, ditandaan ku gawé bareng jeung nagara-nagara séjén dina ngungkulan tangtangan global, liwat peran kapamingpinan Indonesia dina forum G20 taun 2022 jeung ASEAN taun 2023.
Oemar ogé negeskeun yén éta pangakuan téh bisa ningkatkeun kasadaran kana Bahasa Indonesia, ogé jadi bagéan tina usaha global pikeun ngembangkeun konektivitas antarbangsa, nguatan gawé bareng jeung UNESCO, sarta bagéan tina komitmen Indonesia kana pangwangunan budaya di tingkat internasional.
“Pangakuan Bahasa Indonesia minangka basa resmi Konferensi Umum UNESCO bakal méré pangaruh positif kana katengtreman, karukunan, jeung kahontalna tujuan pangwangunan anu ngalajuninglaku lain ngan saukur di tingkat nasional, tapi ogé di sakuliah dunya,” ceuk Oemar deui.
Tarékah pamaréntah Indonesia pikeun ngusulkeun Bahasa Indonesia minangka basa resmi Konferensi Umum UNESCO téh salasahiji implementasi amanat pasal 44 ayat (1) Undang-Undang Nomer 24 Taun 2009 ngeunaan “Bendera, Bahasa, dan Lambang Negara, serta Lagu Kabangsaan”, anu eusina, "Pemerintah meningkatkan fungsi Bahasa Indonesia menjadi bahasa internasional secara bertahap, sistematis, dan berkelanjutan."
Éta usulan gé mangrupa usaha de jure (dumasar hukum) sangkan Bahasa Indonesia meunangkeun status basa resmi di lembaga internasional, sanggeus sacara de facto (dumasar fakta), pamaréntah Indonesia geus ngawangun kantong-kantong panyatur asing basa Indonesia di 52 nagara.
“Ku pangakuan Bahasa Indonesia jadi basa resmi dina Konferensi Umum UNESCO, tangtu ieu téh hiji kareueus pikeun sakumna bangsa Indonesia,” ceuk Presiden Jokowi.***
Baca Juga: Pangna Gamelan Sekatén Cirebon Ditabeuhna Sataun Dua Kali