Arya Permana Graha Makalangan Deui

GALURA-Arya Permana Graha teh pituin urang Kabupaten Kuningan. Sanajan mancen gawe di Jakarta, copelna sabulan sakali mulang ka lembur.

Sok komo kiwari, inyana keur tatahar nyanghareupan pemilu 2024, anu sababaraha bulan deui baris lumangsung.

Enya, Arya teh kaasup salah saurang bacaleg DPR RI Daerah Pemilihan Jabar X (Kuningan Ciamis Banjar Pangandaran) ti Partai Persatuan Pembangunan (PPP).

Dina Pemilu samemehna, inyana oge nyalonkeun ti partai jeung di dapil anu sarua. Ngan nya kitu, harita mah teu kabiruyungan jadi anggota DPR RI.

Pikeun nebus kagagalan dina pemilu anu geus kaliwat, kiwari Arya keur ngawangun kakuatan sangkan unggul dina pemilu 2024.

"Jurus-jurusna mah anu umum, kedah caket sareng masarakat, kenging simpati ti masarakat," ceuk Arya, basa tepung Dina acara Kemah Jurnalis, di Waduk Darma, Saptu, (30/9/2023) kaliwat.***