Network
GALURA -Kabupaten Bandung jadi pinunjul Binojakrama Pedalangan Wayang Golek Purwa ka-36 Provinsi Jawa Barat 2021 nu di gelar di Kabupaten Sukabumi.
Harita dalang nu hasil mawa deui piala bagilir Bokor Mas Kencana Astagina téh Khanha Sandhika Ade Kosasi Sunarya.
Ku kituna, Kabupaten Bandung jadi pribumi Binojakrama Pedalangan Wayang Golek Purwa ka-37 taun 2023 ayeuna.
Kepala Dinas Pariwisata dan Kebudayaan (Kadisparbud) Kabupaten Bandung Wawan A Ridwan mertelakeun, jadi katangtuan kabupaten atawa kota nu jadi pinunjul Binojakrama jadi pribumi Binojakrama.
Baca Juga: Rek Néwak Bayawak, Dua Warga Pataruman Banjar Kabawa Cai Citanduy, Nepi ka Kiwari Can Kapanggih
“Najan kitu, Pepadi Jawa Barat tacan ngirim surat ka Kabupaten Bandung jadi pribumi,” pokna waktu ditepungan di kantorna, Juma'ah (19/1/2023).
Ceuk Wawan, Disparbud bakal gempungan mun seug geus resmi ditunjuk jadi pribumi. Naon nu kudu disiapkeun, konsepna sigah kumaha, " ceuk Wawan
Wawan nyebutkeun, anggaranana mah geus diusulkeun taun 2021. "Taun ieu keur dirarancang,” pokna.
Lamun geus resmi, Disparbud siap. Dina Calender of Event 2023 ku Disparbud Kabupaten Bandung geus diagendakeun Binojakrama Pedalangan Wayang Golek Purwa ka-37 taun 2023 bulan November 2023.*** Sopandi
