GALURA.CO.ID -Keris keur urang Jawa lain saukur karya seni. Mpu, sebutan keur nu sok nyieunan keris mampuh nyiptakeun keris nu mibanda maunat atawa ceuk urang Jawa mah tuah sarta mangaruhan pisan ka nu mibandana,
Contona keris meunang nyieun Mpu Gandring. Waktu dicokot ku nu pesenna, Kén Arok, kerisna tina fisikna masih kasar, tacan dilemesan jeung tacan disipuh. Atuh tina jihad kabatinanana tacan dilemesan masih mancerkeun aura panas.
Para ahli keris nganggap keris jieunan Mpu Gandring mawa bencana, menta wae korban jiwa. Mpu Gandring tilar keris jieunana sorangan, dipateni ku Ken Arok. Korban sejenna: Akuwu Tunggul Ametung, Tumenggung Kebo Ijo, Ken Arok atawa Rajasa, Prajurid, Anusapati jeung Tohjaya.
Sanggeus menta korban tujuh urang, keris Mpu Gandring ngereles, duka ka mana jeung duka ayana di mana. Tepi ka danget ieu tacan kapuluruh. Ceuk sakaol keris Mpu Gandring masih keneh aya, ngan taya saurangoge nu apeleun.
Ceuk sakaol keris Mpu Gandring tepi ka ayeuna masih mawa bencana. Tina kituna bangsa urang mindeng kajadian banjir getih. Geus puguh ari di jaman karajaan mah, sanggeus nagara urang merdeka oge apan kajadian baruntakna PKI taun 1948 jeung taun 1965.
Beusi Kumbayana
Jaman Mataram, jaman Amangkurat 1, oge kungsi muncul keris nu pikagigiseun kawas keris Mpu Gandring, ngaranna keris Margopati. Dijieun tina meteor nu ragrag di Désa Mijén, ninggang hiji imah.
Batu meteorna teh henteu gede ngan ngalantarankeun imah nu katinggangna ancur burakrakan. Anu nyicinganana, tujuh urang palastra saharita keneh.