Network
GALURA.CO.ID -Masjid Agung Demak aya panto nu dingaranan Lawang Bledheg. Lawang harti panto, ari bledeheg hartina gelap (bs. Indonesia: petir). Lawang Bledheg: Panto Gelap. Pantona teh diukir, motifna tutuwuhan, suluran (lung), jambangan, mahkota siga stupa, tumpal, camara, jeung hulu naga, dua, nu ngaluarkeun seuneu.
Ceuk sakaol ukiran naga di eta panto teh wujud gelap nu nu ditewak ku Ki Ageng Selo. Harita Ki Adeng Selo keur macul di sawah ujug-ujug hujan dibarung ku gelap dordar. Nu sejen mah haranjat, tapi Ki Ageng Selo mah jongjon macul, sarta waktu aya gelap nu rek nyamber gancang ditewak sarta diasupkeun kana wadah.
Mungguh elmu pangaweruh mah ukiran bieu teh candra sangkala (bs.Jawa: sengkalan memet) nu dina basa deungeun mah:chronogram. Ukiranana lain saukir-ukirna, tapi ngandung kalimah: “naga mulat salira wani”.
Baca Juga: Hawu, Bagbaganana jeung Hasiatna keur Ubar
Naga nuduhkeun angka 8; mulat angka 8; salira angka 3; wani angka 1. Maca angkana ti katuhu, jadi: 1388, ieu nuduhkeun taun Saka, dina taun Masehi mah taun 1466. Taun 1388 Saka atawa taun 1466 Masehi teh ceuk sakaol titimangsa mimiti diadegkeunana Masjid Agung Demak. Baheula memang nulis taun sok ku candra sangkala.
Supatmo, dosen Jurusan Seni Rupa Universitas Negeri Semarang (UNS) nyebetkeun Lawang Bledheg teh ngandung ajen-inajen simbolis pra-Islam. “Motif tradisi seni hias pra-Islam (Jawa, Hindu, Buddha, jeung China) dina ornamen Lawang Bledheg Masjid Agung Demak teh simbolisasi ngeunaan toleransi,” pokna.
Toleransi anu dimaksud teh kana pluralitas budaya masarakat dina awal budaya Islam di Jawa, lebah dieu di Demak. Ngandung harti harita di Jawa, masyarakat mibanda budaya nu beda-beda, malah aya budaya hasil campuran budaya Jawa, Hindu, Budha, jeung China nu tembong dina bangunan, sikep hirup, dahareun jeung sajabana.***
