GALURA -Teu kaleuleuwihi upama Desa Tigaherang nu di pernah di Kecamatan Rajadesa, dijulukan Desa Kopi di Kabupaten Ciamis jeung di Provinsi Jawa Barat.
Desa Tigaherang nu legana ngahontal 660.970 hektar, pakebonana ampir kabeh dipelakan kopi, sigana panglegana di Kecamatan Rajadesa mah. Sakali panen, dihasilkeun ton-an, pantes mun Desa Tigaherang dilandi Desa Kopi teh.
Julukan Desa Kopi keur Desa Tigaherang nu pernahana teu pati jauh ti Walungan Cijolang tapel wates Kecamatan Rajadesa Ciamis jeung Kecamatan Subang, Kuningan, lain ukur pedah kebon kopina lega tapi oge pedah wargana ahli kana melak kopi. Masing kumaha wae angarna lahan ku urang Tigagherang mah pelak kopina salubur.
Baca Juga: Pa Boji, Ahli Melak Kopi ti DesaTigaherang Rajadesa, Imahna Kaimpungan ku Patani Kopi
Urang Desa Tigaherang marelak kopina teh lain ukur di Lampung jeung di lemburna tapi oge di wewengkon sejen nu aya lahan nganggur.
Desa Tigaherang nu wargana ahli melak kopi, di Kecamatan Rajadesa, malah mah di Kabupaten Ciamis mah kaasup desa kahot, desa nu geus lila ngadeg.
Lahan di Desa Tigaherang , sawah: 297.720 hektar, kebon: 238.891 hektar,
pakarangan: 68.590 hektar, leuweung: 35 hektar, jeung lahan sejenna: 24.579 hektar.
Urang Desa Tigaherang jeung urang desa sejenna nu marelak tangkal kopi panen unggal taunna panen munggaranana teh bulan April, Mei, Juni jeung Juli, mangsa panenna opat bulan lantaran asakna buah kopi dina samanggar oge henteu sarua.
Baca Juga: Putri Anjungsari (34), Prajurit Cirebon Ngudag nu Ngabelesurkeun Pangpung, Tapi Dipacikeuh
Dina sabata lahan (14 meter pasagi) bisa dipelakan 4 tepi ka 5 tangkal kopi. Anggangna ti tangkal ka tangkal paling deukeut 2 meteran. Dina satangkal aya kana 40 dahan. Eta oge gumantung kana kumaha tangkal kopina, mun tangkalna alus mah leuwih ti 40 dahan.
Waktu “ngaranting” sanggeus panen, patani biasana bari milihan mana dahan nu kudu dipiceun. Ngaranting teh nengetan tangkal kopi bisi keuna ku hama, babakuna ku hama tunggeu, jeung ulam. Dina ngaranting mun dahanna dianggap loba teuing dahanna ditutuh.
Ngagemukna mah, make gemuk organic, biasana bulan Mei tepi ka Juni, saacan asup kana usum halodo. Ngagemukna deui dina Nopember tepi ka Desember, keur usum hujan. Sataun teh dua kali ngagemuk.
“Mung taun ayeuna mah sasih Mei sareng Juni teu tiasa ngagemuk, margi ti Mei oge tos arang hujan,” ceuk Pa Boji, salahsaurang ahli melal kopi urang Desa Tigaherang.***