Juag Kurban Sapi
Ku NS Priatna
JUAG rarayna ngadadak beureum, waosna kekerot, ramo leungeunna, duanana, dikeupeulkeun mani tipepereket. Jung nangtung, merong badegana nu keur deku dina ubin bari ngeluk tungkul. Laju lajag-lejeg bari nulak cangkeng, lambena nu pias lantaran tacan dilipen stip, mani monyong-monyong wae, siga nu rek sapok-pokeun ngagantawang nyarekan laklak dasar.
“Kurang ajar Si RT, kacida teuing,” pokna teugeug.
“Abdi teu tiasa nanaon, Agan. Upami Si Denok teu dibantun deui bilih kumaha onam.”
“Ayeuna di mana Si Denokna?” Juag nyengledkeun leungeun bajuna, rarayna masih siga tambaga atah beuleum.
“Di luar, di sisi jalan,” tembal badegana.
“Aman? Moal kabur?”
“Moal, Agan, dijagi ku duaan.”
“Eta bener Si RT menta buruh sangkan Si Denok ditarima?”