Network
GALURA.CO.ID -Ratusan calon siswa milih datang ka SMAN 1 Cilaku, Kabupaten Cianjur keur daftar daring dibangtu ku sakola tujuan (05/06/2024). Balukarna, sakola ngaladenan warga jadi leuwih lila tepi ka jam 8 peuting.
Plh Kadisdik Jabar, M. Ade Afriandi nyebutkeun aya sababaraha faktor pangna loba siswa jeung kolotna daratang ka sakola.
"Kahiji, fasilitas nu kurang di imah siswa. Kadua, hariwangeun tacan kadaftar, padahal geus daftar mandiri di imah tepi ka ngarasa perlu datang ka sakola tujuan," pokna. Inyana mastikeun prinsip utama dina PPDB: masarakat diladenan jeung moal aya sakola nu ditinggalkeun atawa nu teu kaamodasi.
“Simkuring yakin lain ukur di SMAN 1 Cilaku (didongdon ku siswa jeung kolotna), di sakola sejenna oge pasti aya. Lebah dieu masarakat kudu diladenan," pokna. Plh Kadisdik nalingaan PPDB di Kabupaten Bandung Barat jeung Kabupaten Cianjur di Kantor Cabang Dinas Pendidikan Wilayah VI.
Make zoom, panitia PPDB di sakola bisa langsung koordinasi jeung Kantor Cabang Dinas lamun aya pasualan. Pj. Gubernur Jabar, nyebutkeun unggal poe Pemprov Jabar terus ngaevaluasi sangkan PPDB leuwih hade. "Idealna sampurna, taya kakurangan. Masih aya waktu keur ngomeanana,” pokna.
Sarengsena Rapat Pimpinan Pemprov Jabar di Taman Hutan Raya Ir. Juanda, Kota Bandung, inyana ngawanti-wanti calon siswa entong nunda-nunda daptar. "Ati-ati mun daftar di wates waktu pangmukas (deadline), ulah error lagi (lantaran loba ngaakses)," pungkasna.***
