Network
GALURA.CO.ID - Dinas Pendidikan (Disdik) Kabupaten Majalengka nembongkeun deui prestasina. Dina Festival Kurikulum Merdeka Tingkat Jawa Barat anu dilaksanakeun di Bandung, Kemis nepi ka Jumaah (30-31/05/2024), Disik Kabupaten Majalengka dileler pangajen. Ieu festival teh runtuyan ti Bulan Merdeka Belajar taun 2024.
Festival dipokalan ku Kementerian Pendidikan, Kebudayaan, Riset dan Teknologi (Kemendikbudristek) sarta dikokolakeun ku Balai Besar Penjaminan Mutu Pendidikan (BBPMP) Provinsi Jawa Barat pikeun ngarojong implementasi Kurikulum Merdeka sacara nasional.
Kabupaten Majalengka nyangking dua layang pangajen penting dina ieu festival. Pangajen ditampa langsung ku Kepala Dinas Pendidikan (Disdik) Kabupaten Majalengka, Lilis Yuliasih.
Lilis Yuliasih netelakeun Festival Kurikulum Merdeka boga udagan keur ngaamplifikasi (leuwih ngamotekarkeun) praktek jeung implementasi Kurikulum Merdeka sarta mengkuhkeun lumangsungna Kurikulum Merdeka.
“Pangajen ditampi ku Dinas Pendidikan Kabupaten Majalengka kana komitmen, rojongan, hasil, sarta ngaronjatkeun skor Indeks Pencapaian SPM Pendidikan sacara noron dina periode taun 2022-2024. Kalih ti eta pangajen kangge Bapa Tata Subrata, video panghadena 5 dina lomba potret cerita Kurikulum Merdeka," ceuk Lilis.
Masih ceuk Lilis, pangajen jadi bukti komitmen Dinas Pendidikan Kabupaten Majalengka dina ngawujudkuen Kabupaten Majalengka jadi Kabupaten Pendidikan.
Ceuk Lilis, urang sakumna kudu tuluy soson-soson, inovasi pikeun kamajuan pendidikan di Kabupaten Majalengka. Implementasi Kurikulum Merdeka pikeun ngaronjatkeun kualitas pendidikan di Majalengka.
“Hatur nuhun ka sadayana, kana loyalitas, integritas, sareng sinergitas kangge Dinas Pendidikan Kabupaten Majalengka dugi ka Dinas Pendidikan Kabupaten Majalengka kenging apresiasi tur pangajen ti Kemendikbudristek," ceuk Kadisdik.
"Naon-naon nu kahontal, kedah janten motivasi kapayunna kangge langkung hade deui dina ngantransformasi pendidikan di Kabupaten Majalengka,” ceuk Lilis.*** Ayank R Sambara
