Network
GALURA-Bursa Kerja Khusus (BKK) Sekolah Menengah Kejuruan (SMK) Pertiwi Kuningan ngayakeun Job Fair, di GOR H. Tjetje Priatna, lingkungan Kampus SMK Pertiwi Kuningan, Jalan Siliwangi (Kasturi-Cirendang), Poe Kemis, 23 November 2023.
Eta kagiatan teh dina enas-enasna mah nepungkeun pencari kerja (pencaker) jeung pihak pausahaan anu butuh tanaga gawe.
Aya 20 pausahaan anu miluan Job Fair. Dina poe kahiji calon tanaga gawe anu datang ka acara Job Fair teh ngahontal 700 urang.
Pupuhu BKK SMK Pertiwi Kuningan, Dikdik Pebriana, nyebutkeun Job Fair di SMK Pertiwi Kuningan, lumangsung salila dua poe, Kemis-Jumaah, 23-24 November 2023.
Ceuk Dikdik, panitia nargetkeun
leuwih ti 500 urang anu datang. Luyu reujeung target, anu datang poe kahiji ngahontal 700 urang.
Tacan katambahan ku anu daratang dina poe kadua. Sajaba alumni SMK Pertiwi Kuningan, aya di antarana saluareun alumni eta sakola.
“Harepan mah setengah tina jumlah palamar anu sumping, seueur anu katampa di pausahaan-pausahaan," ceuk Dikdik.
Salasaurang pangusaha di Kuningan, anu ngaluuhan eta acara, Rokhmat Ardiyan, reueus jeung kataji ku diayakeun Job Fair di SMK Pertiwi Kuningan.
Inyana ngarojong tarekah anu dilakonan ku SMK Pertiwi Kuningan dina ngamalirkeun lulusan pikeun miboga gawe, ku cara nepungkeun reujeung sababaraha urang pausahaan.
Kahareupna, Rokhmat Ardiyan miharep, kagiatan kawas Kitu diayakeun deui, Sangkan mayeng.
