GALURA.CO.ID -Karajaan Cirebon dumasar sumber-sumber tradisional di Cirebon diadegkeun ku Walangsungsang. Ari Walangsungsang nu oge disebut Cakrabuana seuweu Sri Baduga Maharaja, raja Pajajaran, ti Subanglarang. Sri Baduga ka Subanglarang teh pernahna kapiadi. Subanglarang taya lian ti siwi pamanna nu jadi panguasa wilayah di Pantura Cirebon.
Walangsungsang kitu deui adi-adina, Raja Sangara jeung Larasantang, dilahirkan sawaktu Sri Baduga nu ngaran asalna Pamanah Rasa atawa Jayadewata tacan dijenengkeun jadi raja di Pajajaran. Ayana di Pajajaran sabab kawin ka Kentring Manik Mayang Sunda nu oge siwi pamanna beda indung: Prabuk Susuk Tunggal.
Ku sabab ngarasa henteu betah di Pakuan Pajajaran, Walangsungsang hayang bubuara ka tempat sejen, ka basisir kaler. Pangna teu bataheun Walangsungsang jeung adi-adina diatik ajaran agama Islam ku biangna, ari di Pakuan Pajajaran mayoritas nganut agama Sunda wiwitan, najan geus nganut paham monothisme.
Walangsungsang ngadegkeun Karajaan Cirebon dina abad ka-15 Masehi, taun 1430 Masehi. Ku sabab ngajenan jeung wujud teu poho ka karuhunna, Karaton Pakungwati nu diadegkeunana nyanghareup ka kulon, nyanghareup ka Galuh (Kawali). Bapana lahir jeung digedekeun di Galuh, malah jadi putra mahkota Karajaan Galuh.
Ku Prabu Sri Baduga Maharaja saterusna Waalngsungsang diangkat jadi panguasa wilayah. Sri Baduga ngirimkeun utusanana ka Cirebon bari mawa Mande Jajar, tempat Sri Baduga ngistrenan Walangsungsang. Mande Jajar ayeuna diteundeun di lawang asup ka Gunung Sembung, tempat dikurebkeunana Sunan Gunung Jati.
Tanda jadi karajaan daerah nu ngindung ka Pajajaran, Cirebon sataun sakali ngirim upeti ka Rajagaluh (Majalengka), upetina teh tarasi nu jumlahna teu loba. Rajagaluh diadegkeun ku Dewa Nisakala, akina Walangsungsang. Dewa Niskala sabada ngencagkeun kulungguhanana sarta dipasrahkeun ka Pamanah Rasa, laju ngadegkeun Rajagaluh.
Sabada Syarif Hidayat nu sawaktu geus tilar dijulukan Sunan Gunung Jati, jadi raja Cirebon, siwi Walangsungsang ngadahup ka Sunan Gunung Jati, Cirebon diojok-ojok ku Demak teu ngirimkeun deui upeti. Raja Rajagaluh, Cakraningrat, wera. Rajagaluh jeung Cirebon ahirna perang. Cirebon bisa nalukeun Rajagaluh make reka perdaya. Cirebon jeung Banten dibantuan ku Demak ahirna ngarurug Karajaan Pajajaran tepi ka Pajajaran runtag.
Naon sababna Walangsungsang masrahkeun Cirebon ka minantuna nu oge sipat anak (Sunan Gunung Djati seuweu Larasantang)? Walangsungsang teu bogaeun seuweu atawa anak lalaki. Jaman harita geus galib raja nu teu bogaeun anak lalaki, karajaanana diserenkeun ka minantuna, saperti Susuk Tunggal masrahkeun Pajajaran ka Pamanahrasa.
Tapi jaman harita mah minantu raja masih keneh aya hubungan baraya. ***