Network
GALURA -Carita atawa dongeng jurig, prah nyampak di balaréa di Tatar Sunda. Asalna mah di pakampungan. Tapi ayeuna nyaliara ka pakotaan. Malah mindeng disiarkeun dina TV, dina media sosial wangun carita mistik atawa misteri, kalawan rupa-rupa judul nu sénsasional.
Saenyana di pakampungan Tatar Sunda, geus teu pati dipaliré deui sual dongeng jurig teh. Nu baheula dianggap panonoban jurig, kayaning tempat angker, tangkal caringin, hulu cai, jeung sajabana geus areuweuh. Réa nu geus salin jinis jadi kompléks paimahan.
Apan béh ditu mah, di pakampungan Tatar Sunda sohor bangsa jurig. Rupa-rupa jrimna. Rupa-rupa ngaranna. Aya rorongkong, jurig jarian, jurig cai, jurig kuris, kunti, kélong, dedemit, genderuwo, jin, siluman, jeung sajabana. Atuh dongeng jurig oge loba pisan.
Baca Juga: Sompral, Suaban Ngandung Gambaran Kasombongan, Kudu Disinglar, Matak Cilaka
Pangna dongeng jurig teu haneut deui, lantaran di pakampungan geus réa madrasah, pasantrén, majelis ta’lim, jeung rea-rea deui, nu ngajarkeun tauhid. Percaya jeung sieun ngan wungkul ka Alloh SWT.
Harkat martabat manusa nu tauhidna kuat, leuwih luhur batan bangsa jin,sétan, iblis marakayangan sabalad-balad. Malah budak gé geus teu sieuneun ku perjurigan.
Hiji dongéng pakampungan, budak ngéléhkeun jurig, kieu: “Aya budak satepak, balik ngaji bada isa, sorangan. Sajajalan ngapalkeun du’a saméméh dahar nu cikénéh diajarkeun ku guruna.
“Allohumma bariklana fima rozaktana, waqina adzaban nar”. Ya Alloh berkahan rejeki abdi sadaya, sareng tangtayungan abdi sadaya tina siksa naraka.
Baca Juga: Dongeng Kawenehan di Walungan Cimanuk, Nempo Widadari Ngarojay di Leuwi Batuputri
Harita aya jurig rék nyingsieunan éta budak, handapeun tangkal balingbing nu hieum. Ngadéngé gerendeng du’a, Si Jurig ngabecir. Bari ngadégdég,jeung kukulutus : “Haram jadah, bebencit téh rék ngahakan aing geuning?! Tobaaat ! Ampuuun...!”
Sanajan kitu, ari carita atawa dongéng jurig mah, masih kénéh sok jadi bahan wangkongan. Pangpangna di garduh ronda. Komo tas aya nu maot “baseuh” alatan kacilakaan atawa rajapati. Sok dipapantes sakadaék. Ngan geus tara aya nu sieun. Nu puguh mah seuri tingcalakatak.
Cenah sok aya nu kawénéhan nenjo jurig ngabelegedeg. Tapi tara diaranggap deui. Upama ngaliwat ka tempat rada keueung, haté teteg ku maca patihah, palakbinna jeung aya Kursi.
Ongkoh jurigna geus parindah kana telepisi. Tuh bangsa Ma Lampir, Sundel Bolong, sabatur-batur, balawiri di dinya. Saha nu sieun?
Leungitna kasieun balaréa ku jurig, mangaruhan kana cambalna “elmu gaib” nu bisa nimbulkeun panyakit “misterius” samodél teluh, ganggaong, pélét, gendam, pipahokan.
Kana panyakit misterius masih kénéh aya hiji-hijieun nu mercaya. Minimal lima taun sakali dina usum pilkada, pemilu jeung pilpres, dina pilkades deui.***
