GALURA.CO.ID -Komisi I DPRD Jawa Barat kunjungan kerja (kunker) ka Komisi Pemilihan Umum Daerah (KPUD) Kota Cimahi dina raraga Fungsi Pengawasan Dewan. Kunker dipingpin langsung ku Ketua Komisi I DPRD Jawa Barat, Dr. H. Bedi Budiman. Anu miluna sakumna anggota Komisi I DPRD Jawa Barat.
Bedi Budiman ngajentrekeun kuker Komisi I DPRD Jawa Barat teh keur ngaroris kasiapan Pemilu 2024 di Kota Cimahi. Pihakna hayang mastikeun kasiapan logistik saperti surat suara jeung sajaba. Salian ti eta ngaroris DPT atawa Daftar Pemilih Tetap, jeung DPTb (Daftar Pemilih tambahan), hususna di Kota Cimahi.
Aya sabaraha hal nu disorot Komisi I DPRD Jawa Barat. Hiji di antarana: patali jeung rekrutmen patugas KPPS (Kelompok Penyelenggara Pemungutan Suara) nu mancen tugas di TPS, hususna soal jaminan kasehatan keur patugas KPPS. “Naha patugas KPPS meunang asuransi kesehatan atawa acan,” ceuk Bedi Budiman.
Bedi Budiman nyebutkeun asuransi kesehatan keur patugas KPPS teh penting pisan lantaran bisa wae patugas KPPS mancet tugas tepi ka tengah peuting. Malah bisa jadi tepi ka janari. Ulah aya tepi ka patugas KPPS gering komo tepi ka tilar mah. Lobana patugas KPPS nu tilar dina Pemilu 2019 ulah kajadian deui dina Pemilu 2024.***